Foto: Reuters
BRUXELES, 2 de Febreru (EUROPA PRESS)
El plenu de la Eurocámara aprobó una resolución na qu'apoya l'embargu al petroleu iranín aprobáu polos xefes de la diplomacia de los Ventisiete'l pasáu 23 de xineru, y pide que se compense a los Estaos miembros afectaos por esta midida, ente ellos España, qu'importa'l 14% del petróleu d'Irán.
Los eurodiputaos tamién reclamen a Teherán que ponga fin al so programa nuclear y condenen enérxicamente l'amenaza de zarrar l'estrechu d'Ormuz.
La resolución, aprobada nun votu a mano alzada, asegura que les nueves sanciones y les midíes diplomátiques "podríen contribuyir a que'l Gobiernu iranín acepte y respete les resoluciones de Naciones Uníes, "evitando asina la posibilidá d'una intervención militar".
Sicasí, el Parlamentu Européu dexa claro que ye necesario "acortar, na midida de lo posible, les repercusiones negatives na población civil, sobremanera nos grupos más vulnerables".
El testu recuerda que l'embargu sobre les esportaciones de petroleu iranín a la UE va ser gradual, y que los contratos yá acabaos van poder siguir executándose hasta'l próximu 1 de xunetu. Nesti sen, la Eurocámara pide al Conseyu qu'adopte les midíes necesaries pa compensar a los Estaos miembros poles consecuencies del embargu.
NUN EXISTE UNA SOLUCIÓN MILITAR
Per otra parte, la Eurocámara condena enérxicamente l'amenaza d'Irán de zarrar l'estrechu d'Ormuz y encamienta a Teherán que nun bloquie l'accesu, pues un actu d'esti tipu "podría provocar un conflictu rexonal y desencadenar en represalies per parte de la comunidá internacional".
El Parlamentu Européu apoya'l compromisu de los Gobiernos de la UE de trabayar en favor d'una solución diplomática de la cuestión nuclear iranina y repite que los problemes pendientes con Irán tienen que resolvese de forma pacífica. "Nun existe una solución militar pal conflictu", sorrayen los eurodiputaos.
El testu aprobáu reconoz que'l diálogu y la cooperación con Turquía puen desempeñar un papel importante p'algamar un acuerdu. Amás, llamenta que China y Rusia sigan negándose a apoyar les sanciones contra Irán nel Conseyu de Seguridá de la ONU y pide a Rusia que dexe d'aportar ayuda pal desarrollu nuclear iranín hasta qu'esti país cumpla dafechu les resoluciones de Naciones Uníes.