UVIÉU, 18 d'Avientu (EUROPA PRESS)
La recoyida d'alimentos entamada esti xueves n'Uviéu por Falange Española de les Jons y Grupu Patriota Asturies solo pa persones españoles mientres la mañana en plenu centru d'Uviéu y nuna zona bien comercial, na cai Uría, trescurrió vixilada por un ampliu dispositivu policial.
Los organizadores de la campaña '1 quilu, una esperanza' que contaben con permisu del Conceyu pa instalase hasta les 13.00 hores tuvieron recoyendo de ciudadanos productos como conserves, alimentos envasaos, llegumes, y tou tipu d'alimentos perecederos pa families españoles precisaes.
L'actividá causó polémica na ciudá por cuenta de les protestes de delles organizaciones, como Equo, qu'entendía una vulneración de la Constitución Española que se destinaren alimentos namás a los españoles. Sicasí, el delegáu provincial de la Falange n'Asturies, Jorge Cabanas, esclaró esti miércoles qu'ellos defenden la unidá d'España y que la so iniciativa inclúi a toles persones que viven n'España.
En tou casu, les sos esplicaciones nun paecieron convencer a otres organizaciones, como l'Asamblea Antifascista D'Uviéu. Miembros d'esta última organización, a pocos metros d'onde se recoyía comida, repartíen octavielles ente los viandantes criticando l'actividá y tachándola de racista.
En tou casu, tola zona tuvo bien vixilada por efectivos de la Policía Nacional. Trés furgonetes taben aparcaes na zona y los axentes taben pendientes hasta les 13.00 hores, cuando los organizadores yá se retiraron.
