La familia Franco deberá abrir al públicu'l Pazo de Meirás

SANTIAGO DE COMPOSTELA, 30 d'Avientu (EUROPA PRESS)

El Gobiernu gallegu aprobó güei'l decretu pol que'l Pazo de Meirás, asitiáu na población coruñesa de Sada, pasa formar parte de la llista de bienes d'interés cultural (BIC) de Galicia, polo que la familia Franco deberá abrir al públicu esti edificiu del sieglu XIX y estilu neomedieval cuatro veces al mes de baldre.

Al acabar el Conseyu de la Xunta, el presidente gallegu, Emilio Pérez Touriño, esplicó que la declaración como BIC cola categoraía de sitiu históricu supón otorgar al Pazo de Meirás el "mayor grau de proteición" qu'existe na comunidá gallega y detalló que va entrar en vixencia de magar la publicación del decretu nel Diariu Oficial de Galicia (DOG).

La Xunta recordó que l'Ayuntamientu de Sada solicitó en branu del 2007 la declaración como BIC d'esti edificiu, mui lligáu a la figura de la escritora Emilia Pardo Bazán, asina como que la Conseyería de Cultura tuvo que dir a los tribunales pola "negativa" de la familia Franco, que nun permitió la entrada de los téunicos de Patrimoniu pa inspeicionar l'inmueble y conocer el so estáu.

Finalmente, el Tribunal Superior de Xusticia de Galicia resolvió autorizar la entrada de los téunicos, qu'inspeicionaren el 'pazu' (casona) n'abril del 2008. N'agostu d'esti añu entamaron los trámites pa la declaración como BIC d'esti espaciu, que recibió 105 alegaciones, que nun fueron estimaes.

Cola decisión del Gobiernu gallegu, los propietarios deberán abrir la casona al públicu de baldre cuatro díes al mes. Amás, cualquier intervencion nél necesitará una autorización previa per parte de los sos propietarios y Patrimoniu, que recibió 105 alegaciones que nun s'estimaron.

La declaración de les Torres de Meirás como BIC cola categoría de sitiu históricu básase en que "destaca pola so singularidá, como pola significación cultural y simbólica qu'algamó col pasu del tiempu". "Nengún de los edificios d'estilu asemeyáu iguala al de Meirás en dimensiones, en contestu históricu, en coherencia conceptual y en calidá formal", calcó la Conseyería de Cultura.