UVIÉU, 18 d'Agostu (EUROPA PRESS)
El Fondu pa la Protección de los Animales Selvaxes (Fapas) emitió esti vienres una nota de prensa na qu'asegura que los caballos que tien nos montes de Teberga sí son asturcones. D'esta forma, el Fapas salía al pasu de les crítiques de l'Asociación de Criadores de Ponis de Raza Asturcón (Acpra), quien afirmara que nun yeren asturcones por nun tar inscritos nel llibru xenealóxicu de la raza. Dende Fapas consideren "risible" l'acusación.
Esplicaron que los caballos mercáronse a criadores que tienen documentación de los animales, pero que l'asociación nun quiso inscribir en nenguna asociación para "caltenese al marxe del eternu conflictu existente col mundu del caballu asturcón, basáu na hexemonía y control de les sovenciones públiques qu'ayuden al caltenimientu d'esta raza".
Na so opinión, resulta "ridículu" que nun tar inscritu nun llibru seya motivu de dexar de pertenecer a una raza. "Técnicamente, un caballu pertenez a determinada raza poles sos característiques morfolóxiques, non por tar o dexar de tar inscritu en nengún rexistru", insistieron.
Dende'l Fapas esplicaron que recibieron una llamada anónima "amenazante" qu'agora albidren que venía d'Acpra, pa que nun usaren la palabra asturcón. "Simple y llanamente alvirtióse-y de la so mala educación y que se remataba la conversación", apuntaron
Dende l'asociación llamenten qu'un patrimoniu biolóxico y cultural como ye'l caballu asturcón siga siendo "focu de conflictos y polémiques" y d'actitúes más propies "d'entidaes mafioses".
