UVIÉU, 24 de Xunetu (EUROPA PRESS)
El Fondu pa la Protección de los Animales Selvaxes (Fapas) anunció esti xueves que va reforzar el control de la población osera nes árees más alloñaes de los sos núcleos de reproducción. Según el Fapas, el patrón de comportamientu del osu pardu indica "claramente" qu'hai un enclín d'osos mozos a alloñase de les árees de reproducción y percorrer otros territorios.
Esti comportamientu, esplicaron en nota de prensa, produzse especialmente nos exemplares machos, qu'empecipien desplazamientos en busca d'alimentación o a cencielles allóñense como una pauta de comportamientu p'afayar nuevos territorios.
Asina, apuntaron, yá nun ye estraño alcontrar nel centru d'Asturies osos hasta les llendes del Conceyu d'Uviéu. Pol occidente, la presencia nos territorios que llenden conceyos como Ayande, Grandas de Salime y Pezós foi nesta primavera avezao.
Ante esta circunstancia, el Fapas anunció que va aumentar la so radio d'acción nel siguimientu de los osos sobre territorios "nos qu'hasta agora nun se trabayó" y onde "hai bien poca información sobre cuántos osos hai o en que dómines visiten esos territorios". Trátase de los conceyos que formen parte del área occidental d'Asturies, llegando hasta'l territoriu costeru de Castropol, onde, según el Fapas, constatóse en dalguna ocasión presencia osera.
Otra de les árees onde s'aprecia una mayor presencia d'osos, son los conceyos centrales, como Salas, Tinéu y Grau. Nesti últimu conceyu yá existen femes reproductores, confirmándose la nacencia de dellos esbardos.
