UVIÉU, 24 d'Ochobre (EUROPA PRESS)
El rei Felipe VI punxo en valor esti vienres l'Estáu de Derechu vixente n'España, que "nun ye frutu de la improvisación", sinón resultáu de "la voluntá decidida del pueblu español", qu'optó por constituyir una democracia na que "toos, ciudadanos ya instituciones" tuvieren "sometíos por igual al mandatu de la llei".
Frente al rixu independentista per parte de dellos sectores en Cataluña, el monarca aseguró que "los españoles yá nun son "rivales los unos de los otros". "Nun solo compartimos historia. Compartimos intereses y valores comunes; tenemos una mesma voluntá de pertenecer a Europa, de ser Europa. Y sobremanera, compartimos sentimientos", dixo.
El rei mostróse convencíu de que "la comprensión, la consideración, el ciñu y el respetu mutuos son sentimientos enraigonaos nel corazón de los españoles y compartíos de norte a sur y d'este a oeste" del territoriu. "Y toos esos sentimientos, nin los debemos escaecer nunca, nin perder. Al contrari, tenemos que caltenelos y alimentalos", insistió.
"Queremos una España alloñada de la división y de la discordia", declaró, recordando que nel so discursu de proclamación el pasáu 19 de xunu yá señaló "el deber y la necesidá de garantizar, y coles mesmes de revitalizar la nuesa convivencia".
Pero pa "garantizar" esta vida de mancomún, precisó, ye necesario "respetar y observar" el marcu constitucional y democráticu, pues ye lo que permite "que tolos españoles puean exercer los sos derechos, que les instituciones y los ciudadanos cumplan colos sos deberes y asuman les sos responsabilidaes, y pa que funcione ordenadamente la nuesa vida colectiva".
El rei fizo un llamáu a tolos españoles pa que seyan conscientes de que tenemos qu'encarar el futuru "cola fortaleza" qu'esixe un mundu distintu que "camina hacia una mayor integración y non al contrario". Por ello, animó a trabayar "nun proyectu integrador, sentíu y compartíu por toos, y que mire siempre hacia alantre".
Pero tamién fizo un alegatu pa mirar "con serenidá" la nuesa historia de mancomún, reconociendo les sos "lluces y solombres", deprendiendo de los erros del pasáu", pero tamién sintiéndonos "arguyosos" del progresu llograo col puxu de toos, "especialmente nes últimes décades".
Sin querer cayer na autocomplacencia, Felipe VI reconoció que nesti momentu, la sociedá española "precisa referencies morales a les qu'almirar y respetar; principios éticos que reconocer y observar; valores cívicos que caltener y fomentar".
Porque ye con esi puxu moral colectivo col que se pue y debe facese d'España una nación ilusionada, enllena de vida y pensamientu; enllena d'idees que merezan l'enfotu de los ciudadanos; de proyectos qu'atraigan la mente y la voluntá de toos y conquisten los sos corazones". Ye asina, añadió, como podría alloñase "el pesimismu, la rocea y el desencantu de munchos ciudadanos que demuestren, almirablemente, una capacidá d'esfuerzu y de sacrificiu digna de tou respetu".
Nel so discursu, unu de los más importantes que pronuncia Don Felipe a lo llargo del añu, el rei emponderó ún a ún a los premiaos colos Príncipe d'Asturies d'esta edición.
MAS ESFUERZOS FRENTE AL ÉBOLA
El Premiu de la Concordia a la periodista congoleña Caddy Adzuba permitió-y al monarca llamar l'atención sobre'l "dolor y mieu" que ta xenerando, sobremanera n'África, la epidemia de ébola. Una crisis que, dixo, "obliga a la comunidá internacional a acordar y comprometer más esfuerzos, y más eficaces, na llucha contra'l virus y contra'l so espardimientu mundial, asina como nel tratamientu a los afectaos".
Nesa llucha onde "rellumen les histories exemplares d'entrega, xenerosidá y profesionalidá" de médicos, sanitarios, científicos, relixosos, cooperantes y militares, el rei agradeció a toos ellos, sobremanera a los españoles, la so "competencia y capacidá". "Sois un arguyu pa España", díxo-yos.
MÁS APOYU A LA INVESTIGACIÓN
El Premiu d'Investigación Científica y Técnica a los químicos Avelino Corma, Mark Y. Davis y Galen D. Stucky valió pa que Felipe VI apostara por qu'España recupere "el máximu apoyu posible a la investigación, porque ello ye condición indispensable p'avanzar y competir meyor, pal nuesu prestixu y capacidá d'ayudar a otros y, sobremanera, pal nuesu propiu bienestar".
Del arquitectu estaounidense Frank Gehry, galardonáu col Premiu de les Artes, destacó "la visión artística, la fuerza y la guapura coles que lleva a cabu los sos proyectos". Mientres que del historiador ya hispanista francés Joseph Pérez, Premiu de Ciencies Sociales, sorrayó que nos sos analises y estudios, "bien documentaos, nun da llugar a supuestes verdaes nin a verdaes a medies, sinón que busca siempre ser oxetivu, equilibráu y alloñáu de los tópicos".
El Premiu de Comunicación y Humanidaes recayó esti añu la primer vez nun dibuxante, Joaquín Salvador Lavado, 'Quino', creador de Mafalda y que, al traviés de los sos personaxes, tresmite "valores educativos universales" que mos recuerden la necesidá d'orientamos siempre polos meyores y más sólidos principios y valores", dixo'l rei.
Del escritor irlandés John Banville, Premiu de les Lletres, el monarca destacó les descripciones qu'ellabora nes sos noveles, a les que calificó de "retazos d'arte con mayúscules".
Sobre'l Programa de beques Fulbright, promovíu pol Gobiernu d'EEUU, dixo que ye un instrumentu pa la paz y l'amistá ente naciones".
Nel so discursu, y como yá fuera'l día de la so proclamación, el rei tuvo palabres de reconocencia pa la so madre, la Reina Sofía, presente nel Teatru Campoamor, y que'l so apoyu "nunca-y faltó, nin a él nin a la so muyer, Doña Letizia, nestos 34 años de vida de la Fundación Príncipe d'Asturies.
