Fernández coincide con IU en promover polítiques industriales y refuga qu'Asturies seya una comunidá subsidiada

UVIÉU, 23 de Mayu (EUROPA PRESS)

L'únicu candidatu a la Presidencia d'Asturies, el socialista Javier Fernández, destacó esti miércoles la necesidá de promover polítiques industriales pa orientar el modelu productivu asturianu y xenerar empléu. Amás refugó, como diz UPyD qu'Asturies tea subsidiada.

D'esta manera, coincidió col voceru d'Izquierda Unida, Jesús Iglesias, mientres la segunda sesión del plenu d'Elección del Presidente d'Asturies, na que va contar col apoyu de los cinco diputaos d'IU pa salir proclamáu nuevu xefe del Executivu asturianu. Según Fernández van ser importantes les polítiques industriales que modernicen, y dirixe el texíu productivu, amás de fomentar la competitividá de les empreses nel mediu rural.

El candidatu, que se comprometió a protexer l'asturianu anque sin llegar a la cooficialidá, calcó, amás, na necesidá de reordenar el sector públicu y reconoció que va tener que llevase a cabu un "axuste drásticu", anque nun lo concretó a falta de conocer les cuentes autonómiques.

VA PIDIR MÁS TIEMPU A MONTORO

Amás, Javier Fernández afirmó que va pidir más tiempu al ministru de Facienda, Cristóbal Montoro, pa ellaborar un nuevu plan económicu y financieru "rigorosu y seriu". "Nun pue facese de manera sumaria algo tan esixente como un plan a trés años", remarcó alvirtiendo de que si nun hai una ampliación de plazu pue ser "una chambonada", que dende'l nuevu Executivu nun quieren enviar y, entiende, tampoco va querer recibir el Gobiernu central.

El candidatu, que se comprometió a cumplir la lexislación, almite que-y encantaría escluyir delles partíes del axuste anque cree que nun lo podrá facer. "Toos sentimos la necesidá de rebelión", dixo, añadiendo que como futuru presidente d'Asturies nun pue cayer na insumisión, sinón que va tener qu'atender a la llealtá institucional.

COMUNIDÁ SOVENCIONADA

El candidatu socialista negó per otra parte qu'Asturies seya una sociedá subsidiada, y almitió que l'apoyu a los entamadores ye una falta qu'espera reparar, xunto al impulsu d'una Formación Profesional al estilu alemán.

Asina lo dixo na so vez de retruque al voceru d'UPyD, Ignacio Priendes. Según Fernández, Asturies dispón de tresferencies como'l restu de comunidaes y tien un sector concretu sovencionáu, en referencia a la minería del carbón. "Lo que más me preocupa ye que'l términu 'subsidiáu' tresmite un fondu posu sicolóxico de pesimismu a la sociedá asturiana que tendríamos d'aforrá-ylo", calcó. Amás, el candidatu apostó por trabayar pa reducir la desafección ciudadana hacia los políticos y la política.

PLAN D'AFORRU ENERXÉTICU

Mientres la so intervención, el líder socialista anunció que va promover un plan a llargu plazu d'aforru y eficiencia enerxética pal Área Central pa meyorar la competitividá empresarial y la movilidá de la zona más poblada d'Asturies.

Pa Fernández la Área Central ye "una de les potencialidaes qu'hai qu'esplotar y nun se ta faciendo lo suficientemente bien". Amás, según el candidatu, nesi camín va haber que cambiar "mentalidaes y rivalidaes pa tornales en complicidá".

Ello ye que no que se refier a la fusión de conceyos, Fernández señaló que dende'l Gobiernu va encarar con "decisión y prudencia" la reforma del mapa municipal ante los fuertes vínculos de los ciudadanos cola so población. Amás, resaltó qu'Asturies ye, xunto con Murcia, la comunidá que tien más axustáu'l númberu de conceyos a la so población.

DEFENSA DEL ESTÁU AUTONÓMICU

Fernández fizo, amás, una defensa del Estáu de les autonomíes, "que permiten a la política pegase al terrén pa responder dende la proximidá a les esixencies y necesidaes de los ciudadanos". "Tamos falando d'un estáu complexu, non por caprichu sinón por consensu básicu de la Constitución", remarcó, reconociendo que va haber que trabayar pa meyorar el modelu y racionalizalu.

Tocantes a los pactos colos axentes sociales, el candidatu contestó a Prendes que "nun van sustituyir" a la Cámara, puesto que "nun lo ficieron nunca", de la que repitió la so intención de promover tanto pactos políticos como pactos sociales, que son "coses distintes, pero necesaries".