Fernández defende la llingua asturiana pero dexa claro que "nun va adulterar" el so programa

Contador
Javier Fernández
ARMANDO ÁLVAREZ
Publicado 14/11/2017 13:54:28CET

UVIÉU, 14 Nov. (EUROPA PRESS) -

El presidente del Gobiernu asturianu, el socialista Javier Fernández, refirióse esti martes, na so intervención inicial del debate d'orientación política correspondiente al añu llexislativu 2017-2018, a la llingua asturiana. Defendió la so protección, pero dixo que nun va "adulterar" el programa electoral col que se presentó a les elecciones.

Les palabres del dirixente rexonal confirmaron que l'Executivu nun cuenta con impulsar la oficialidá del asturianu nesta llexislatura, porque ye dalgo que nun s'incluía nel programa electoral nos últimos comicios rexonales.

"Esti Gobiernu, añadió, nun tien problema dalgún col asturianu nin col cumplimientu de les sos promeses electorales. Tendríalo si se desnaturalizara o intentara adulterar el contratu públicu colos electores", comentó'l dirixente asturianu. L'impulsu de la oficialidá del asturianu aprobóse nel últimu Congresu de la Federación Socialista Asturiana (FSA-PSOE), nel qu'Adrián Barbón sustituyó a Fernández como secretariu xeneral del partíu.

Nel so discursu, Javier Fernández, refirióse a polítiques del so gobiernu nesti asuntu, como'l plan pilotu esperimental pal usu del asturianu dientro del sistema educativu, dalgo que "tanto-y mancó a les bancaes de la derecha".

Pa Javier Fernández, l'asturianu ye un "patrimoniu cultural perimportante" y nun ye dalgo muertu. Quier que sía un patrimoniu "vivu" y añadió que la so protección y promoción ye un mandáu estatutariu desarrolláu "nuna llei vixente que los socialistes asumieron nel nuestru programa". Nesi sentíu, apuntó, va'l programa pilotu enantes mentáu, que ye amás "respetuosu" col ordenamientu xurídicu actual.

Esta web utiliza cookies propias y de terceros para analizar su navegación y ofrecerle un servicio más personalizado y publicidad acorde a sus intereses. Continuar navegando implica la aceptación de nuestra política de cookies -
Uso de cookies