Fernández (PSOE) pide ayuda al PP pa suavizar la situación con Montoro y reducir les tarifes eléctriques

UVIÉU, 23 de Mayu (EUROPA PRESS)

El candidatu a la Presidencia d'Asturies, el socialista Javier Fernández, pidió esti miércoles al PP asturianu que lu ayudara a suavizar la situación col ministru de Facienda, Cristóbal Montoro, pa disponer de más tiempu pa ellaborar el nuevu plan económicu y financieru.

Coles mesmes, espera contar col apoyu de la presidenta del PP d'Asturies, Mercedes Fernández, pa que'l Gobiernu de Mariano Rajoy atienda la necesidá de reducir les tarifes eléctriques pa garantizar la competitividá de les empreses ubicaes na comunidá.

Asina lo dixo mientres la so vez de respuesta a la vocera del PP, Mercedes Fernández, na segunda sesión del plenu d'Elección del Presidente d'Asturies na que va proclamase nuevu xefe del Executivu asturianu col apoyu del diputáu d'UPyD y los cinco parlamentarios d'IU.

Igualmente, a preguntes de la diputada popular, resaltó la so voluntá de poner en marcha'l nuevu Hospital Universitariu Central d'Asturies (HUCA) y el Campus de la Salú cuanto antes, anque almite que va tener qu'esperar a conocer los recursos disponibles pa saber si podrá facese "dientro d'un mes o d'un añu". Amás, remarcó qu'en sanidá, igual que n'educación, existe una diferencia ideolóxica clara ente PP y PSOE.

Per otra parte, Fernández recordó cómo la FSA-PSOE, tovía defendiendo la presunción d'inocencia, espulsó de forma "inmediata" al ex conseyeru de Educación José Luis Iglesias Riopedre imputáu nel 'Casu Marea', mientres que'l PP nun actuó con esa "inmediatez" en casos de corrupción como la 'Gürtel'. "Toi abiertu a que se mos mire y se mos rexistre porque tamos llimpios", afirmó, calcando en que, per contra, sobre la trama 'Gürtel' el PP precisaría "una endoscopia qu'entrara lo más fondo del so aparatu dixestivu".

MINERÍA DEL CARBÓN

Otru asuntu destacáu mientres el debate ente'l candidatu y la vocera del PP foi la minería del carbón, sobre la que Mercedes Fernández mostró l'apoyu pa la defensa d'un sector clave p'Asturies, anque reprochó la inacción del PSOE asturianu na época del Gobiernu de José Luis Rodríguez Zapatero.

Al respecto, Javier Fernández encamentó al Gobiernu central a "cambiar de paecer" y modificar la so actuación pa frenar la retirada de les ayudes, dao que sinón "va acabar" cola minería del carbón provocando'l "colapsu" na actividá privada. "Esto ye dramático siempres, pero más nestos momentos", alvirtió, esixendo al PP que nun eche "balones fuera" nin s'enrede en "reproches al pasáu", porque si nun s'actúa "cuanto antes" va acabar col nerviu económicu de les "comarques mineres".

"ECONOMÍA VUDÚ" Y "CACHARRERÍA LLIBERAL"

Con too, Javier Fernández criticó la esixencia de la diputada del PP de concretar los axustes que piensa llevar a cabu, dao que considera que nun va poder entrar en detalles hasta conocer les cuentes autonómiques. Nesti sen, calificó'l modelu económicu y prodcutivu del PP de "economía vudú" y "cacharrería lliberal".

Igualmente, ironizó cola credibilidá que pue tener un Gobiernu como'l de Rajoy, que comprometió un programa en campaña y dempués fai lo contrario o aplaza cuatro meses unos presupuestos pa intentar influyir nunes elecciones autonómiques. "Nun me venga a falar de seriedá", reprochó-y afirmando que sabe cuáles son les principales faltes d'Asturies, como l'impulsu a la cultura entamadora o la baxa tasa d'actividá, ente otres, y comprométese a promover midíes que permitan sacar Asturies alantre.