Festexos propón que los principales conciertos de San Mateo se celebren nel parking del Tartiere

UVIÉU, 11 de Xunu (EUROPA PRESS)

Los principales conciertos del cartel de les fiestes de San Mateo van celebrase nun recintu afayáu na zona de La Iría, nel entornu del Parking del Carlos Tartiere. P'asistir a algunos d'ellos cobraráse una entrada de seis euros, quitando'l casu d'aquellos artistes qu'incluyan la so actuación nuna xira con preciu preestablecíu.

Polo menos asina lo propunxo la conceyal y presidenta de la Sociedá Uvieína de Festexos, Belén Fernández, a la Xunta qu'esti órganu celebró esti martes, y que tendrá que tomar una decisión al respecto.

Na xunta diose cuenta del informe definitivu que desaconseyaba realizar conciertos de gran aforu na Plaza de la Catedral. Según esplicó Fernández, "tanto pa Policía como pa Bomberos, l'espaciu con menos problemes d'evacuación yera l'aparcamientu del campu de fútbol". Amás, tuvieron en cuenta la cuestión económica, puesto que "nel casu de San Lázaro (la otra alternativa a analizar) habría que cubrir les pistes y parte de verde, lo que costaría 113.000 euros, amás de ser necesario practicar determinaes víes d'evacuación".

Con éses, la intención del Executivu municipal ye qu'esti área de La Iría acueya los principales conciertos, mientres que los de menor concurrencia siguiríen desarrollándose en La Catedral. La llinia divisoria ente los conciertos afayaízos pa un llugar o otru van marcala los técnicos correspondientes al analizar cada propuesta musical y la so previsión d'asistencia.

Los técnicos de Bomberos, Policía y Protección Civil realizaron la propuesta, basándose nel Códigu Técnicu d'Edificación. Según el mesmu, la capacidá l'aforu máximu de la Plaza de la Catedral tendría que ser d'un máximu de 1.400 persones. Si espera una mayor asistencia, l'actuación tendría que treslladase a La Iría.

Fernández prevé que dellos de los conciertos nel recintu del Tartiere seyan de pagu, anque tovía nun ta en condiciones d'esclarar si van ser la mayoría o namás algunos. El preciu d'entrada qu'estima ye de seis euros, quitando aquellos artistes qu'incluyan el so recital nuna xira con preciu yá preestablecíu. Nesti casu respetará la cuantía del músicu en cuestión.

La propuesta tamién inclúi la reubicación de los chiringos por motivos de seguridá. Trátase del de los vecinos de La Corredoria y del que s'ubica más cercanu al edificiu de Telefónica. El documentu aconseya dexar estes zones llibres, asina que l'Equipu de Gobiernu va proponer a los xestores d'ambos puestos la so instalación "n'otru llugar próximu a la parte de fiestes".