ROMA, 22 de Marzu (Reuters/EP)
Los barcos de rescate que tienen delles ONG frente a la costa de Libia tán afectando a la llucha contra'l tráficu de persones y abriendo "un corredor" que n'últimu términu ta provocando la muerte de más inmigrantes y refuxaos, caltuvo esti miércoles un fiscal italianu.
El fiscal xefe de la ciudá portuaria de Catania, Carmelo Zuccaro, señaló qu'abarrunta que podría haber una comunicación directa ente los traficantes en Libia y miembros de los barcos de rescate qu'operen les ONG. De normal, la Guardia Costera italiana envía a los barcos de rescate en recibiendo llamaes de socorru.
"Toi convencíu del fechu de que non siempre ye'l centru de mandu (de la Guardia Costera) el que llama a les ONG", afirmó Zuccaro ante una comisión parlamentaria sobre asuntos europeos. El fiscal destacó que los contactos de les ONG tán n'internet, polo que ye posible que cualquier puea llamar.
"Asina que, ¿pue escluyise qu'hai llamaes directes? Estos contactos nun se demostraron nin escluyeron", sorrayó Zuccaro, calteniendo que "merez la pena investigalo".
El númberu d'inmigrantes que trata de cruzar hacia Europa al traviés de la travesía ente Libia ya Italia aumentó enforma esti añu tres l'acuerdu firmáu pola UE va un añu con Turquía, que prácticamente zarró la ruta marítima hacia Grecia.
El mes pasáu, el tribunal de Catania creó un grupu de trabayu p'analizar los posibles llazos financieros ente los traficantes y les ONG. Según Zuccaro, de momentu nun s'alcontraron pruebes d'esa colusión.
La mayoría de los 181.000 inmigrantes que llegaron por barcu a Italia l'añu pasáu rescatáronse nel mar. El 30 por cientu de los rescates de 2016 fueron obra de les ONG, mientres que no que va d'añu realizaron un 50 por cientu de los rescates, según Zuccaro.
El fiscal caltuvo que les ONG tán bloquiando de fechu los esfuerzos pa combatir el tráficu de persones dao que resulta bien fácil cruzar les 12 milles náutiques y llegar a los sos barcos de rescate esperando xusto onde acaben les agües territoriales libies mientres los traficantes pueden quedar en casa, fuera del algame de les autoridaes.
