El fiscal pide investigar a De Lorenzo, Caunedo, Cachero, Mortera, Espinosa, y Reinares por una venta de suelu

UVIÉU, 19 de Xunu (EUROPA PRESS)

L'actual alcalde d'Uviéu, Agustín Iglesias Caunedo, l'anterior, Gabino de Lorenzo, los exconceyales del PP Alberto Mortera, Isabel Pérez-Espinosa y José Suárez-Arias Cachero (agora militante de Foru Asturies), y l'actual primer teniente alcalde, Jaime Reinares, podríen investigase por un posible delitu de prevaricación na venta de la parcela B16 del polígonu industrial d'Olloniegu.

La Fiscalía d'Asturies dirixióse al Conceyu pa requerir los nomes de los integrantes de la Xunta de Gobiernu, que'l 14 d'agostu del 2008 aprobaron la devolución a la promotora Urvisa del aval de 17.000 euros qu'entregara pola compra d'esti suelu nel 2003, amás del que yera conceyal de Llicencies nel 2007. En rueda prensa esti miércoles, el voceru municipal socialista, Alfredo Carreño, nomó a los cinco primeros como miembros de la Xunta y al últimu, Reinares, como responsable de Llicencies.

El conceyal del PSOE informó de que la Fiscalía ve "nicios de delitu de prevaricación" na so conducta, motivu pol que requirió los sos nomes. L'ilícitu básase na devolución de dichu aval sin que la empresa cumpliera les sos obligaciones contractuales al mercar el suelu, y en nun facer nada pa solucionar la situación, siendo'l Gobiernu local, al traviés del so conceyal de Llicencies, "perfectamente conocedor de la situación", esplicó Carreño.

VENDIDA NEL 2003

El conceyal socialista Feliz Fernández, tamién presente na rueda de prensa, resumió los fechos. El Conceyu viende nel 2003 la parcela B16, de 16.000 metros cuadraos, a la promotora Urvisa, a un preciu de 33 euros el metro cuadráu, "cuando'l so costu nel mercáu sería de 84", señala'l conceyal. Nel contratu inclúise, como condición resulutoria, la imposibilidá de vender o alquilar dichu suelu, y el compromisu de crear actividá empresarial nél nun plazu de dos años, "con 72 puestos de trabayu".

En casu d'incumplimientu d'eses condiciones, el contratu establecía la so disolución. "Nun solo nun tenía'l Conceyu que devolver l'aval, sinón que tuviera que quedar cola parcela y tolo construyío nella", matiza Fernández.

Sicasí, el conceyal socialista narró qu'Urvisa, esi mesmu añu 2003 vendió la parcela a otra promotora, Bitácora, que de siguío dividió l'área en 17 naves, pa vender cuatro d'elles nel 2007 a Promociones Caudal. "En febreru del 2007", sigue, "Reinares, conceyal de Llicencies, recuerda a la empresa qu'incumple'l contratu, lo que demuestra que'l Conceyu tenía plena conocencia".

Nel 2008, añade, "la Xunta de Gobiernu llevanta la condición resolutoria" y aprueba devolver l'aval. "Hasta esi momentu, esclara'l representante municipal del PSOE, "nun se creara nin un solu puestu de trabayu".

EL PSOE DENUNCIARA EN 2010

Carreño y Fernández denunciaron estos fechos ante la Fiscalía nel añu 2010, plantegando un posible delitu de fraude nes sovenciones. Sicasí, el Ministeriu Públicu entama actuaciones agora cola tesis de la posible prevaricación per parte de la Xunta de Gobiernu, por aprobar la devolución del aval sin qu'Urvisa cumpliera'l contratu, y per parte del conceyal de Llicencies, "por ser conocedor y nun facer nada", esplica Carreño.

El PSOE va personase nesta causa como acusación particular, con oxetu "de que s'investigue y se llegue hasta'l final na depuración de responsabilidaes". Carreño recordó que'l so partíu alertó en numberoses ocasiones sobre la forma de proceder na venta de parceles del polígonu d'Olloniegu, y de la B16 en particular. Na so opinión, esti casu "resume una forma de gobernar n'Uviéu que lleva más de dos décades".