Foto: REUTERS/STRINGER
MADRID, 2 de Febreru (EUROPA PRESS)
El fiscal xeneral exipciu, Abdel Meguid Mahmud, ordenó l'arrestu del xefe de la seguridá de Port Said y del responsable d'investigación de la Policía dempués de los violentos disturbios que se rexistraron esti miércoles al cabu d'un partíu de fútbol y saldáronse con polo menos 74 muertos, informa'l diariu 'Al Ahram'.
Les fuerces de seguridá tán acusaes de nun intervenir pa detener la engarrada qu'empezó al acabar un partíu ente los equipos Al Masry, d'El Cairo, y A'l Ahly, col resultáu de 3-1 favorable a los primeros. Los siguidores del Al Masry invadieron el campu tres un encruz d'insultos mientres l'alcuentru y corrieron tres los xugadores del equipu visitante, lo que derivó nun enfrentamientu ente les dos hinchaes.
De primeres, el primer ministru exipciu, Kamal el Ganzouri, anunciara la destitución del gobernador de Port Said y del director de seguridá, lo mesmo que de la xunta directiva de la Federación de Fútbol exipciu polos socesos d'esti miércoles.
Según informó esti xueves el forense xefe del país, Ashraf el Refai, nenguna de les víctimes de la traxedia presentaba firíes de bala. Na so mayoría, los finaos morrieron por golpes na cabeza con oxetos contundentes y afogaos por cuenta de la estampida que se produxo al entamar los enfrentamientos, precisó.
Según El Rafei, a los finaos namás se-yos practicaron exames médicos y non autopsies puramente diches, dao que la mayoría de les sos families nun queríen que se-yos realizaren exames forenses.
Mentanto, miles de manifestantes enfurecíos entamaron a primer hora d'esta tarde una marcha dende distintos puntos d'El Cairu hacia'l Ministeriu del Interior pa protestar pola actuación policial nel estadiu.