La Fiscalía de Palermo estudia si la Cosa Nostra ta detrás de los grupos de Facebook qu'apoyen a la mafia

ROMA, 07 de Xineru (EUROPA PRESS)

La Fiscalía de Palermo ta estudiando "con muncha atención" l'auxe de grupos qu'allabancien a la familia al traviés del Facebook y hasta diba tar dispuesta a una investigación xudicial nesti sen, según publicó güei'l diariu 'La Republica'.

La multipilicación de los grupos de siguidores que celebren les 'fazañes' de los grandes xefes de la Cosa Nostra nes páxines de Facebook, la mayor rede social del mundu, ta causando gran indignación n'Italia.

Indignación que nos últimos díes se fizo especialmente intensa de magar la reciente censura per parte de los alministradores de Facebook de les semeyes que muestren a muyeres dando de mamar a los sos neñinos.

Abondos internautes y tamién representantes del mundu de la política italiana denunciaron la "incongruencia" de la rede social que, en cambiu, nun paez tar mui preocupada polos grupos qu'allabancien a organizaciones criminales tan crueles como Cosa Nostra.

Según La Republica, les autoridaes xudiciales italianes tán tomando en consideranza la posibilidá de que detrás d'estos grupos tea, nin más nin menos, que la propia Cosa Nostra --la histórica mafia siciliana--, con intención d'utilizar la rede pa recuperar la so reputación perdida y ganar apoyos.

En declaraciones a esti diariu, el fiscal nacional antimafia Pietro Grasso, almitió qu'esta hipótesis ye "posible". "Si hasta hai dalgunos años tovía había xefes mafiosos de Palermo que nos sos salones falaben de contactar con periodistes importantes" pa llograr el so apoyu, "¿por qué escluyir que los mafiosos tenten d'esplotar mediáticamente toles posibilidaes?", s'entrugó.