UVIÉU, 19 d'Abril (EUROPA PRESS)
La Fiscalía del Principáu d'Asturies dio a conocer esti miércoles l'escritu d'acusación contra l'ex secretariu xeneral del SOMA-UXT, José Ángel Fernández Villa, y l'ex secretariu del Patronatu de la fundación Infide, Pedro Castillejo. Pa Villa la Fiscalía solicita cinco años de prisión, mientres que pa Castillejo trés y mediu, dambos por delitu continuáu d'apropiación indebida.
Nel so escritu, el fiscal atribúi a Villa un delitu continuáu d'apropiación indebida mientres el tiempu nel que foi responsables de "la máxima capacidá de toma de decisiones" nel SOMA, onde exerció "una posición de dominiu absolutu" del sindicatu, "siendo la persona que tomaba toles decisiones nel mesmu, nomaba'l personal directivo del sindicatu, y decidía la contratación y cese del personal".
Según el so relatu, el exlíder sindical escurriría un plan destináu a esviar los fondos del sindicatu al so patrimoniu personal quedando, ente otres cuestiones, coles dietes abonaes pol Comité intercentros d'Hunosa que correspondíen al sindicatu. Amás presentaría gastos d'aparcamientos, prensa, restoranes, puros, sombreros, flores, centros dietéticos, maletes, farmacia, parafarmacia, delicatessen, llibros, dvd, música, perfumeríes y en distintes tiendes, too ello sin que los pagos tuvieren xustificación dalguna rellacionada cola actividá sindical.
Too ello, repite'l fiscal, deriváu de la so situación de "dominiu total" sobre'l sindicatu. Ente los años 2001 al 2007 Villa gastó cola tarxeta del SOMA un total de 37.120 euros.
A partir de 2008, prosigue l'escritu d'acusación, el exsecretariu xeneral del SOMA "siguió cola dinámica", anque nesta ocasión utilizando delles tarxetes de creitu por importe total de 36.082 euros hasta'l 2012.
Per otru llau, cargó al sindicatu delles factures de teléfonu por importe conxuntu de 1.065 euros que yeren de consumu personal y que pagara l'acusáu, recibiendo en compensación 1.317.
Per otra parte, y a pesar de que disponía de vehículu nel sindicatu pa les xeres que fueren necesaries, "decidió que'l sindicatu procedería a merca-y los vehículos que fueren pertinentes pal so usu particular". Asina, nel 2001 alquirió un Mitsubishi Montero por 33.520 euros; nel 2006 otru coche del mesmu modelu por 52.111 euros, y el seguru del vehículu, con un costu de 13.936 euros.
Pa usu del sindicatu, pero al so nome, mercó un Audi A4 que'l so costu cargóse "lexítimamente" al sindicatu, ordenando tresferencies mensuales de 882 euros pa pagalo dende la so cuenta personal. Sicasí, una vez acabáu de pagar el vehículu, siguió percibiendo la mesma cantidá por esti conceptu mientres casi dos años más, siendo l'importe domináu "por escesu" de 16.764 euros.
La Fiscalía tamién atribúi a Castillejo apropiación indebida mientres la so etapa como secretariu del Patronatu de la Fundación Institutu pa la Formación, Investigación, Documentación ya Estudios Sociales (Infide). Nesta ocasión la suma sube a 119.434,74 euros incorporaos al so patrimoniu al traviés de reintegros d'efectivo, pagos en "innumberables restoranes", farmacies y distintes tiendes ente los años 2004 y 2013.
