UVIÉU, 22 de Xunetu (EUROPA PRESS)
La conseyera de Fomentu y Mediu Ambiente, Belén Fernández, informó esti martes de que'l Gobiernu autonómicu ta estudiando la incidencia que'l préstamu necesariu pa la construcción de la incineradora de Serín va tener na deuda y nel déficit de la Comunidá Autónoma.
En declaraciones a los medios, antes de participar na xornada 'Residuos domésticos y comerciales: estratexes dende Europa, España y Asturies pal llogru de los oxetivos 2020', Fernández esplicó que yá tán remataos los pliegos alministrativos y técnicos pa la contratación d'esta instalación.
Agora, según matizó la conseyera, ta analizándose la incidencia económico-financiera de la licitación. Recordó que "ye necesario dir a un préstamu pa entamar el conxuntu d'instalaciones". "Porta la esixencia d'un aval, que va tener incidencia na deuda y déficit del Principáu y ta faciéndose esi analís económicu y financieru pa ver en qué cantidá inflúi", esplicó.
"A partir d'ehí va perfilase l'estudiu económicu financieru que va llevase a los órganos de gobiernu del Coxersa", acabó la responsable de la cartera de Fomentu.
