FORU alvierte que nel contratu cola empresa VAV pue perxudicar a la TPA

UVIÉU, 18 de Xunu (EUROPA PRESS)

El conseyeru de FORU na RTPA, José Manuel Fernández Lavandera anunció, esti martes, que los conseyeros de FORU nel ente públicu van esixir "responsabilidaes polos daños y perxuicios que deriven de l'axudicación del contratu d'informativos a una empresa en concursu d'acreedores".

Lavandera recuerda que'l 28 de mayu del 2013 la Televisión Pública Asturiana dio anuncia nos sos informativos de que la empresa VAV Compañía de Producciones S.L. presentara esa mañana un concursu voluntariu d'acreedores, añadiendo, amás, que la empresa alcuéntrase en fase preconcursal dende últimos de febreru.

"Los mesmos informativos encargáronse de recordar que la empresa VAV suministra nesti momentu a estos servicios informativos el conteníu de noticies municipales, dempués de que'l pasáu mes d'abril se ficiere cola licitación pública na que presentó la ufierta económica más ventayosa, amás de la propuesta más barata, de les siete empreses qu'acudieron", añadió.

El conseyeru consideró que "la noticia ye verdaderamente preocupante, y preséntase como ún más de la serie encadenada de socesos que vienen teniendo llugar nel Ente Públicu de Comunicación, con mala esplicación y menos xustificación tovía".

"El 31 d'avientu del 2012, fecha na que caducaron los contratos de producción de programes de les mercantiles Televisión del Principáu d'Asturies SAU, Radio del Principáu d'Asturies SAU y Productora de Programes del Principáu, SAU, acordaos por diches Entidaes foi cuando empezó too", señaló'l conseyeru.

Lavandera recordó que "l'acabación de los contratos y la imposibilidá de proceder a la so renovación denunciáronla arrémente los Conseyeros de FORU nel Conseyu d'Alministración, dando llugar ello a precipitaes decisiones de la Dirección que llevaron al despidu'l 31 d'avientu del 2012 d'unos 40 trabayadores poles empreses vinculaes a informativos de RPA y TPA".

"A partir del día 1 de xineru del 2013 los informativos realizáronlos personal propio de la RPA y TPA. Sicasí, l'empeñu, del so director xeneral n'esternalizar los servicios informativos llevólu a que se licitare pol procedimientu de negociáu con publicidá'l contratu del Serviciu de suministru de conteníos municipales pa la producción por Televisión del Principáu d'Asturies de los espacios informativos (espediente. 97/12 TPA), presentándose a licitación delles de les grandes empreses audiovisuales de la nuesa rexón y otres de fuera de la mesma", destacó Lavandera.

CONTRATU POR 745.000 EUROS

El diputáu recordó que'l 25 de marzu de 2013 el contratu axudicóse por un importe de 745.000 euros (IVA escluyíu) a la empresa madrilana VAV Compañía de Producciones S.L. "al presentar la ufierta más ventayosa", según proclama l'anunciu d'axudicación.

"Ello motivó qu'algunes de les grandes productores de servicios audiovisuales espunxeren la so quexa al Gobiernu d'Asturies por axudicar el contratu d'informativos a una empresa que taba en preconcursu d'acreedores. El procesu d'axudicación tamién foi oxetu de repitíes denuncies polos miembros del Conseyu d'Alministración designáu pola Xunta Xeneral d'Asturies a propuesta del grupu parlamentariu de FORU", añadió.

"Sicasí, eses quexes y denuncies nun ficieron tornar la decisión de la Dirección de la TPA d'axudicar el contratu a dicha empresa, de forma que el 30 d'abril del 2013 formalizóse efectivamente'l contratu d'axudicación del serviciu de suministru de conteníos municipales cola citada empresa, confirmando d'esa manera la esternalización de los servicios informativos que veníen realizándose colos mesmos medios personales de la cadena, y ello a favor d'una empresa que nesos momentos alcuéntrase en preconcursu, o lo que ye lo mesmo, n'estáu d'insolvencia (artículu 5 Llei Concursal), situación que tien llugar cuando nun pue cumplir regularmente coles obligaciones esixentes (artículu 2.2. Llei Concursal)", esplicó Lavandera.

"L'axudicación del contratu del serviciu de suministru de conteníos municipales a una empresa como VAV, que presenta tan delicada situación económica d'insolvencia, paezmos, polo menos, gravemente incompetente", afirmó Llavandera.

"Ye deber básicu del alministrador actuar dilixentemente, tolo contrario de los que proceden a asumir obligaciones de pagu sin analizar el riesgu previsible o sin asegurase de les posibilidaes de cumplimientu", añadió.

Lavandera alvirtió que la situación creada ye mui preocupante "porque nesti momentu la TPA ta vinculada contractualmente con una empresa que reconoz alcontrase en situación d'insolvencia, o lo que ye lo mesmo, que nun pue cumplir regularmente coles obligaciones esixentes, con grave riesgu de qu'ello puea perxudicar a la Televisión Pública Asturiana".