Foru pide a Rajoy qu'esplique por qué condena otra vuelta a Asturies a quedar ferroviariamente discriminada

UVIÉU, 22 de Mayu (EUROPA PRESS)

El diputáu de Foru nel Congresu, Enrique Álvarez Sostres, va preguntar al presidente del Gobiernu, Mariano Rajoy, "por qué condena una vegada más a Asturies a quedar ferroviariamente discriminada, marxinada y aislada, incumpliendo'l so programa electoral d'alta velocidá".

Pa ello, Sostres presentó una batería d'entrugues al envís de que "el Gobiernu de Mariano Rajoy esplique por qué a pesar de les repitíes promeses de la ministra, el pasáu 17 de mayu, el Secretariu d'Estáu d'Infraestructures, Tresporte y Vivienda, Rafael Catalá, anunció nuna visita oficial a les obres de la Variante de Payares un cambiu de planes del Ministeriu, de cuenta que la Variante va abrir con namás un túnel, d'anchu ibéricu y pa tráficu misto de viaxeros y mercancíes".

Sostres recuerda que la ministra de Fomentu, Ana Pastor, comprometiérase reiteradamente a instalar l'anchu internacional na Variante ferroviaria de Payares". "Mientres les sos intervenciones parlamentaries nel Congresu de los Diputaos los díes 9 de febreru, 19 y 26 de setiembre del 2012, y nuna visita oficial a Llanes (Asturies) el 28 de setiembre del 2012, la ministra pronuncióse con claridá a favor de la implantación del anchu internacional na citada vía", añade.

Y asegura que "na comparecencia parlamentaria del 9 de febreru del 2012, Ana Pastor dixo testualmente al diputáu de Foru que firma esta entruga: 'Tien el mio compromisu como ministra de Fomentu de que l'anchu internacional va llegar, claro que tien que llegar'", apunta.