Foru tacha de "camelo" el Comité d'Ética anunciáu pola Conseyería de Bienestar Social

UVIÉU, 11 de Xunu (EUROPA PRESS)

La diputada autonómica y vocera de Bienestar Social de FORU na Xunta Xeneral, Esther Landa, tachó esti martes de "camelo" l'anunciu del Conseyu de Gobiernu de crear un Comité d'Ética que rixa les decisiones en materia de servicios sociales, na Conseyería de Bienestar Social.

Al traviés d'un comunicáu, la parlamentaria refierse a la midida como "un recursu camelísticu", y pide al Gobiernu rexonal qu'esplique "les razones que llevaron a la Conseyería de Bienestar a recurrir a esi Comité". Amás, encamiénta-y a dar a conocer "quién y cómo va escoyer a los sos integrantes, les sos funciones y, nel so casu, les sos retribuciones".

"Tamos ante una Conseyería que'l so oxetivu principal ye garantizar l'asistencia social necesaria a los asturianos que s'alcuentren en situaciones d'especial vulnerabilidá. Esto nun ye daqué nuevu sinón namás que la función mesma de la Conseyería. A estes altures del Estáu del Bienestar la ética tuviera que presumise nestos ámbitos; sacantes l'oxetivu seya tapecer la falta de sensibilidá d'una Conseyera reprochada y cuestionada hasta polos sos propios socios "de Gobiernu", esplicó la parlamentaria de FORU.

Landa precisó que, "pese a que FORU nun se muestra en contra d'implementar los esfuerzos éticos, esti Comité seique pretenda frenar les repitíes denuncies nun solo parlamentaries, sinón de distintos sectores de la población, tocantes a les formes d'actuar y de xestionar, con cuenta de que Javier Fernández puea xustificar la permanencia d'Esther Díaz nun cargu pal que nun tien el perfil afayadizu".

"Un Comité -prosiguió la diputada- nun va eliminar la prepotencia de la Conseyera que, saltándose les mayoríes parlamentaries, ta batiendo'l récor d'enfrentamientos con tol mundu, sin el mínimu respetu pa sentir a naide: enfrentóse a grupos políticos, conceyos asturianos, asociaciones del sector, y a los sos propios trabayadores"

"Si l'oxetivu ye xustificar la permanencia d'Esther Díaz nun cargu pal que-y sobra arrogancia y fálta-y talante, lo primero que procede ye esixir que rectifique y se disculpe con tolos agredíos pol so calter bronquista", afirmó Landa, qu'acabó: "la ética, que tien de dir acompañada de bones maneres nes sos decisiones, tien qu'esixise en primer llugar a la Conseyera".