UVIÉU, 18 Abr. (EUROPA PRESS) -
La presidenta de Foru Asturies, Cristina Coto, afirmó que la Comisión Directiva del partíu tovía nun decidió si van participar na manifestación qu'esti sábadu 21 d'abril convoca la Xunta pola Defensa de la Llingua Asturiana pa reivindicar la oficialidá.
A preguntes de los periodistes Coto indicó que se trata d'una decisión que nun trataron "pel momentu". "Esi tema nun lo tratamos", afirmó nuna rueda de prensa celebrada esti miércoles n'Uviéu xunto al secretariu xeneral del partíu, Álvarez-Cascos, que nun se pronunció sobre la cuestión
Na comparecencia énte los medios, Coto anunció que la Comisión Directiva de Foru Asturies alcordó presentar nel Congresu de los Diputaos una enmienda de totalidá al proyectu de Presupuestos Xenerales del Estáu (PXE) de 2018, polo que nun quixo pronunciase sobre la cuestión de la oficialidá.
"Si me dexa vamos centranos güei nesti asuntu que consideramos de relevancia estraordinaria pal futuru d'Asturies", sentenció la presidenta de Foru a preguntes de los medios.
FORU Y LA OFICIALIDÁ
El programa electoral de Foru Asturies recueye que'l partíu va apoyar, "cuando se den les circunstancies polítiques y el consensu social necesario que permitan la reforma del nuestru Estatutu d'Autonomía," el cambiu del so artículu 4 pa incluir la oficialidá, "tal como se recueye nel artículu 3.2 de la Constitución española".
A pesar d'esto, nuna entrevista en xineru n'Onda Cero recoyida por Europa Press, el secretariu xeneral de Foru Asturies y ex presidente del Principáu, Francisco Álvarez-Cascos, afirmó que nesti momentu la posibilidá de qu'exista una oficialidá n'Asturies "ye imposible, dalgo inimaxinable".
Con too, esti miércoles Cascos nun se pronunció sobre la manifestación d'esti sábadu y Coto prefirió más nun opinar. Too eso depués de la Executiva de la FSA-PSOE anunciara que va tar representada na mesma, siendo la primer vez que'l partíu tenga una representación oficial nuna marcha a favor d'esti marcu llegal pal asturianu.
