La fotógrafa estaounidense Annie Leibovitz, premiu Príncipe d'Asturies de Comunicación y Humanidaes 2013

186313.1.260.149.20130523180413

UVIÉU, 23 de Mayu (EUROPA PRESS)

La fotógrafa estaounidense Annie Leibovitz ye la galardonada col Premiu Príncipe d'Asturies de Comunicación y Humanidaes 2013, según fizo público esti xueves n'Uviéu'l xuráu encargáu de la so concesión.

Nacida en Waterbury (Connecticut, EEUU) el 2 d'ochobre de 1949, Anna-Lou, 'Annie', Leibovitz estudió pintura nel Institutu d'Arte de San Francisco, al tiempu que diba a clases vespertines de fotografía. En 1970, antes d'acabar los sos estudios, empezó a trabayar na revista Rolling Stone, de la que trés años más tarde sería xefa de fotografía.

En 1983, cuando les sos fotografíes yá illustraren 142 portaes, dexó esta publicación pa unise al llanzamientu editorial de la nueva Vanity Fair, de la que nesti momentu ye 'contributing editor'. Dende 1998 tamién trabaya pa Vogue, na que yá publicara con anterioridá.

Dende que decidió abandonar el fotoperiodismu a primeros de los 80 -en cubriendo la guerra d'El Líbanu pa Rolling Stone- y centrase na semeya, Annie Leibovitz tornó nuna de les fotógrafes más respetaes nos ámbitos cultural y políticu d'Estaos Uníos. Ante'l so oxetivu posaron, escritores, personalidaes del rock, de la danza y del deporte, líderes políticos y prácticamente toles grandes estrelles de Hollywood.

El so trabayu caracterizóse por una cuidada y sofisticada puesta n'escena, asina como por una estudiada llume que dota a les sos semeyes d'una ambientación característica. En 1975 acompañó como fotógrafa oficial a The Rolling Stones mientres la so xira de conciertos. Les sos imaxes recibieron l'aclamación de la crítica por captar la esencia del tipu de música y l'ambiente que lu arrodiaba.

LES SEMEYES MÁS RECONOCÍES

Ente les semeyes más reconocíes de Leibovitz figuren la última de Richard Nixon como presidente d'Estaos Uníos -al subir al helicópteru cuando abandonaba la Casa Blanca-, la de John Lennon desnudu y abrazáu en posición fetal a Yoko Ono -tomada unes hores primero que l'ex Beatle morriera asesináu-, la de Whoopi Goldberg nuna bañera llena de lleche y la sesión cola reina Isabel II d'Inglaterra nel Palaciu de Buckingham por cuenta de la so visita oficial a Estaos Uníos nel 2007.

Les fotografíes de Leibovitz protagonizaron esposiciones en museos y galeríes de tol mundu, incluyendo la National Portrait Gallery del Institutu Smithsonian de Washington, onde foi la primer muyer y el segundu fotógrafu vivu n'esponer nella; el Centru Internacional de Fotografía de Nueva York, el Stedelijk Museum de Ámsterdam, la Maison Européenne de la Photographie de París.

La National Portrait Gallery de Londres, l'Hermitage de San Petersburgu y el Muséu Pushkin de Moscú. La so obra publicóse en dellos llibros: Annie Leibovitz: Photographs (1983), Annie Leibovitz: Photographs 1970-1990 (1991), Olympic Portraits (1996), onde se muestra'l so trabayu como fotógrafa oficial del equipu olímpicu estaounidense pa los Xuegos de Atlanta; Women (1999), en collaboración con Susan Sontag -Premiu Príncipe d'Asturies de les Lletres 2003-; American Music (2003); A photographer's Life, 1990-2005 (2006); Annie Leibovitz at Work (2008) y Pilgrimage (2011).