PARÍS, 9 d'Ochobre (EUROPA PRESS)
L'aviación militar francesa bombardió esta madrugada la segunda vez posiciones del grupu terrorista Estáu Islámicu en Siria y, según alvirtió'l ministru de Defensa galu, Jean-Yves Le Drian, "nun va ser la última".
Francia sumóse'l mes pasáu a la coalición internacional qu'encabeza Estaos Uníos y que tien como oxetivu contener l'amenaza d'Estáu Islámicu en Siria. Los primeros bombardeos tuvieron llugar el 27 de setiembre y, esti vienres, Le Drian confirmó los segundos.
El ministru de Defensa esplicó nuna entrevista cola emisora Europe 1 que los Rafale franceses atacaron un campu d'entrenamientu yihadista pela redolada de Raqqa, na zona norte de Siria. Estes instalaciones, añadió, valen tamién pa entrenar a terroristes que depués atenten n'Europa.
Le Drian sorrayó que "nun va ser la última vez" que Francia ataque a Estáu Islámicu, consideráu "l'adversariu principal del conflictu". "L'amenaza pa Francia ye Daesh", afirmó, magar tamién criticó al presidente siriu, Bashar al Assad, al qu'acusó de "asesinar al so pueblu".
OFENSIVA RUSA
La coalición antiterrorista que lidera Estaos Uníos desarrolla les sos operaciones en Siria y tamién nel vecín Iraq, onde de fechu concentró los bombardeos mientres los últimos díes. Dende la selmana pasada, Rusia sumóse a los ataques en territoriu siriu, anque actúa al marxe de la coalición.
Según Moscú, les sos operaciones tienen por oxetivu posiciones d'Estáu Islámicu y d'otros grupos terroristes. Sicasí, Le Drian considera qu'ente'l "80 y el 90 por cientu" de les acciones militares nun pretenden contener a la milicia sunina, sinón que "dan prioridá a la seguridá de Bashar al Assad".
