FSA-PSOE califica de "esperpentu" la intervención de Puigdemont y apoya'l requerimientu del Gobiernu

Adrián Barbón (FSA-PSOE)
EUROPA PRESS
Publicado 11/10/2017 14:54:31CET

UVIÉU, 11 Oct. (EUROPA PRESS) -

El secretariu xeneral de la FSA-PSOE, Adrián Barbón, calificó de "esperpentu" la intervención d'ayeri del presidente de Cataluña, Carles Puigdemont, declarando la independencia y depués dexándola en suspensu, "ensin que nesti momentu sepamos si existió tala declaración d'independencia o se suspendió la declaración de la mesma" y apoyó'l requerimientu del Gobiernu español.

Barbón, nun comunicáu, mostró'l so apoyu al requerimientu realizáu pol Gobiernu d'España al presidente catalán pa que diga si declaró la independencia de Cataluña, como pasu previu a cualesquier de les midíes que'l Gobiernu pue tomar al amparu del artículu 155 de la Constitución.

"Creo que ye'l camín afayadizu. Y creo que ye coherente colo que defendimos los socialistes asturianos el 5 d'ochobre pasáu, depués de la primer xunta de la Comisión Executiva Autonómica: el pasu previu al diálogu ye que nun se confirme la declaración unillateral d'independencia. Agora correspuénde-y al Gobiernu de Cataluña tomar les sos propies decisiones. Si confirma que nun se declaró la independencia, ábrese una oportunidá al diálogu. Si confirma que sí se declaró, responsabilidá del Gobiernu de Cataluña va ser lo qu'asoceda", señala Barbón.

Amás, espresó'l so respaldu y el de la Comisión Executiva Autonómica de la FSA-PSOE a les posiciones polítiques que ta calteniendo nesti trescendental momentu'l Secretariu Xeneral del PSOE, Pedro Sánchez, con esi alcuerdu de que la Comisión d'evaluación del Estáu autonómicu dure seis meses y depués, trate la necesaria reforma de la Constitución.

"L'anunciu realizáu por Pedro Sánchez de que se va a tratar la reforma constitucional ye, ensin dulda, la meyor noticia", apunta'l líder de los socialistes asturianos y añade que "España precisa poner a puntu la so Constitución, pues la España de 2017 nun ye la España de 1978. Tenemos que facer frente a los problemes que toos conocemos y la forma d'encaralos ye con esta reforma. La meyor manera de defender la Constitución y la so vixencia ye reformala y actualizala al momentu presente".

Esta web utiliza cookies propias y de terceros para analizar su navegación y ofrecerle un servicio más personalizado y publicidad acorde a sus intereses. Continuar navegando implica la aceptación de nuestra política de cookies -
Uso de cookies