La Fundación Caveda y Nava considera que l'artículu cuartu acordáu por PSOE y PP impón "derechu de vetu" a la oficialidá

   El presidente de la Fundación Caveda y Nava, Inaciu Iglesias, considera que'l modelu d'artículu cuartu del Estatutu d'Autonomía acordáu por PSOE y PP que nun recueye la oficialidá de la llingua asturina impón un "derechu de vetu" a esta posibilidá de cara al futuru.

   Nesti sen se refirió a la necesidá establecida de que pa cualquier modificación del nuevu Estatutu d'Autonomía hay d'algamase un apoyu de los dos tercios de la Xunta Xeneral del Principáu, dalgo mui difícil d'algamar, dada la composición actual del parlamentu asturianu.

   Dende'l so puntu de vista, PP y PSOE "frustraron les esperances d'abrir l'alderique en sede parlamentaria, ya que se tomó la decisión en falsu, y d'espaldes a la sociedá asturiana". Pa él, l'acuerdu "niega los derechos civiles de los usuarios de la llingua y rebaxa ésta al usu familiar; pa llegar a esto nun facía falta dar tantes vueltes", añadió.