UVIÉU, 8 de Payares (EUROPA PRESS)
El profesor Ramón Mariño Paz (Universidá de Santiago de Compostela) caltién que la situación sociollingüística d'Asturies y Galicia foi prácticamente idéntica hasta'l sieglu XIX, con dos idiomes dotaos de prestixu (castellán y llatín) y otru (gallegu o asturianu) sin prestixu pero d'usu oral avezáu pa la mayoría de la población.
Mariño Paz protagonizó esti martes una de les ponencies de la primer de les XXXV Xornaes Internacionales d'Estudiu, qu'entama l'Academia de la Llingua Asturiana n'Uviéu.
El profesor, qu'agradeció la so invitación a la cita como ponente per parte de l'Academia, caltién qu'existe constancia de que lo mesmo l'asturianu como'l gallegu fueron idiomes cultivaos en documentos notariales y alministrativos dende'l sieglu XII hasta'l sieglu XIX (nel casu del asturianu) y hasta'l XVI (nel casu del gallegu).
A partir d'entós y hasta el sieglu XIX, esplica, castellán y llatín son les dos llingües de prestixu, y asturianu y gallegu les llingües falaes pola población. "Derivaos d'esti escenariu hai fechos talos como que'l númberu de testos en gallegu y asturianu que pasen pela imprenta seya escasu, o que nun se dessarrollen procesos de creación d'una gramática o un diccionariu, nin que s'enseñe nes escueles".
Nel casu del gallegu, el ponente señaló que'l surdimientu de movimientos de calter galleguista, cultural y políticu, nel sieglu XIX, ta vinculáu a tol procesu posterior de reivindicación y ampliación del usu de la llingua gallega.
L'apaición más tardía d'esos mesmos movimientos n'Asturies pudiera ser, a xuiciu del profesor en respuesta a les entrugues d'Europa Press, unu de los motivos polos que nesti momentu'l nivel de normalización y presencia oficial del asturianu seya considerablemente menor que'l del gallegu. Recalcó, sicasí, que se trata d'una opinión a priori.
