UVIÉU, 20 Mar. (EUROPA PRESS) -
El conseyeru d'Educación y Cultura, Genaro Alonso, afirmó que LABoral ye un centru "pol que merez la pena apostar" y que nun se pue confiar too al númberu de visitantes. "Faise dañu a la cultura diciendo que dalgo tien valir si tien visitantes", indicó.
Alonso asitióse asina esti martes na Comisión d'Educación y Cultura de la Xunta Xeneral, onde respondió a una entruga de la diputada de Podemos Asturies, Lucia Montejo, sobre'l supuestu "contéu fraudulentu" nes cifres de visitantes a Llaboral Centru d'Arte y Creacción Industrial.
Nesi sentíu, el conseyeru señaló que desconoz lo que se facía enantes de que llegara al cargu y que pel centru pasen investigadores y visitantes que nun pasen per taquilla --punxo d'exemplu les persones que tienen una tarxeta ciudadana de Xixón o del Club de Cultura Principáu d'Asturies--.
"Faise muncho dañu a la cultura diciendo que dalgo tien valir si tien visitantes", afirmó, p'acusar a Montejo d'estropiar la imaxe de LABoral, "que yá pasa per una situación difícil", semando la dulda, polo que-y pidió prudencia y animó-y a demostar l'acusación.
Dende Podemos, Lucia Montejo díxo-y al conseyeru que'l que tien que dar esplicaciones ye él y preguntó-y si cola cantidá de dineru qu'invierten en LABoral, la Conseyería nun pide información. Nesi sentíu, señaló que se tán incluyendo nes estadístiques d'usuarios a los visitantes de la web del centru "o a un lletricista qu'entra a cambiar una bombilla".
La diputada recordó a Alonso que nel so momentu'l Gobiernu asturianu xustificó la inversión nel centru d'arte de Xixón pol númberu de visitantes, cuando eses partíes presupuestaries "comprometieron" la política cultural asturiana "onde yá nun existen sales d'esposiciones, beques o programes de internacionalización".
Asina, afirmó que n'Asturies hubo un "espilfarru" a lo llargo d'años. "Llaboral supunxo un gran problema pa la cultura asturiana, porque invirtieron millones d'euros nun centru que nun tuvo impactu nel territoriu", indicó Montejo, que tamién reconoció que nos últimos tiempos los mesmos trabayadores del Centru consiguieron da-y un xiru y averalo más a los creadores autóctonos.
Na so última intervención, el conseyeru Genaro Alonso negó qu'haya un fraude nel contéu de los visitantes y volvió repitir que confiar too a los visitantes supón facer dañu "a un centru pol que tamos lluchando y pol que merez la pena apostar".
