MADRID, 30 de Xineru (EUROPA PRESS)
El Conseyu de Ministros aprobó esti vienes decretu d'ordenación de los estudios universitarios col que va dexar a les universidaes, a partir del cursu 2015-2014, crear graos de trés años en llugar de los cuatro que, nesti momentu, tienen la mayoría de les carreres universitaries.
La vicepresidenta primera del Gobiernu, Soraya Sáenz de Santamaría, esplicó, na rueda de prensa posterior al Conseyu de Ministros, que con esta regulación s'axusta l'espaciu español d'educación y al espaciu europeo.
El nuevu decretu modifica dos Reales Decretos (el 1393/2007 y el 99/2011), que regulen la ordenación de les enseñances universitaries oficiales y les enseñances oficiales de doctoráu.
La midida establez un arcu que va dende los 180 a los 240 creitos ECTS, polo que los nuevos graos van poder tener una carga lectiva asitiada dientro d'esi marxe. Sicasí, el decretu establez que, a lo menos, los nuevos graos tendrán qu'impartir tolos conteníos que formen parte de les competencies básiques definíes pa caún de los itinerarios académicos.
Per otra parte, apareyada a la reforma de la regulación de los graos, el decretu modifica tamién la regulación de los estudios de master, ampliando los master oficiales a una carga lectiva de 120 creitos ECTS, equivalentes a dos años d'estudios.
La midida caltién la obligatoriedá d'algamar un mínimu de 300 creitos ECTS (unos cinco años d'estudios) ente grau y master pa poder acceder a los estudios de doctoráu, acordies cola normativa del Espaciu Européu d'Educación Superior.
Con esta midida, el Gobiernu pretende flexibilizar la ufierta académica y facilitar la converxencia de los graos españoles colos itinerarios universitarios de "la mayoría de países europeos", coles mires de facilitar la movilidá. A xuiciu del Ministeriu d'Educación, una mayor semeyanza de la estructura de los estudios va facilitar tanto qu'estudiantes estranxeros acuden a realizar los sos estudios a España como que los españoles puean cursar estudios n'otres universidaes.
