Gobiernu y comunidaes autónomes acuerden un plan p'amenorgar l'abandonu nel 2012 a la metá

EP

MADRID, 20 de Payares (EUROPA PRESS)

El Gobiernu y les comunidaes autónomes acordaron güei, nel marcu de la Conferencia Sectorial d'Educación, celebrada nel Ministeriu d'Educación, Política Social y Deporte, un plan p'amenorgar la tasa d'abandonu escolar nel 2012 a la metá, col oxetivu de que s'iguale a la media europea, que s'asitia nel 15 por cientu. Asina, la midida prevé que 570.000 mozos, d'ente 16 y 24 años, continúen los sos estudios más p'allá de les enseñances obligatories.

Esta iniciativa contempla, ente otres aiciones, que los empresarios, al traviés de los axentes sociales, primen la posesión de polo menos el títulu n'Educación Secundaria Obligatoria (ESO) nel accesu de los mozos al emplegu. "Ye una propuesta que nun ta negociada colos axentes sociales tovía, pero yá hubo un intercambiu d'opiniones", adelantó la ministra d'Educación, Política Social y Deporte, Mercedes Cabrera, al acabar el conceyu colos conseyeros del ramu.

"Trátase d'un compromisu colos mozos, les families y cola sociedá, puesto qu'esti programa tien que ver col nuevu modelu de crecimientu económicu basáu nel conocimientu", indicó la ministra p'añadir que'l Gobiernu va destinar a les comunidaes autónomes un total de 121 millones d'euros pa la puesta en marcha d'esti plan nel 2009.

Pa facer un siguimientu del plan, la ministra acordó colos conseyeros la creación d'una Mesa Permanente sobre Abandonu Escolar Tempranu, integrada por representantes del Ministeriu y téunicos autonómicos, que va tar constituyida enantes de qu'acabe l'añu. "Esta comisión va tener total autonomía pa desarrollar les midíes que considera necesaries porque l'abandonu prematuru ye un problema de toles alministraciones", apuntó.

Ente les midíes del programa destaca l'aumentu de les places nos Programes de Cualificación Profesional Inicial (PCPI) --dirixíos a mayores de 16 años que nun tienen la ESO-- al menos hasta 80.000 places cada cursu escolar. Nesta llinia, les comunidaes autónomes diben aumentar la ufierta d'enseñances de Formación Profesional de Grau Mediu, asina como d'artes plástiques y diseñu.