UVIÉU, 22 Jun. (EUROPA PRESS) -
La Conseyería d'Educación y Cultura publicó'l vienres 22 de xunu nel Boletín Oficial del Principáu d'Asturies (BOPA) la convocatoria de dos llinies de subvención pa la normalización social del asturianu y del gallego-asturianu nel 2018 a la que puen acoyese empreses editoriales y fonográfiques.
La primera, con 90.000 euros, tien por oxetu la concesión d'ayudes económiques, en réxime de concurrencia competitiva, pa la promoción del llibru n'asturianu y en gallego-asturianu al traviés d'ayudes económiques a empreses editoriales pa la edición de llibros orixinales o traducíos que pol so interés y calidá ayuden a la normalización "y al arriquecimientu de la nuestra cultura, faciendo posible la constitución d'un fondu bibliográficu en llingua asturiana".
Queden escluyíos d'esta ayuda los llibros de testu pa usu escolar, amás de los llibros recortables, de pegatines, d'exercicios, de coloriar y pintar, álbumes, partitures musicales y cualquier tipu
de llibru ensin testu.
La llinia pa discos, con 20.000 euros, tien por oxetu la concesión d'ayudes económiques, en réxime de concurrencia competitiva, a empreses privaes pa la promoción de la música n'asturianu y en gallego-asturianu, que se realice en diversos soportes físicos o dixitales.
A los fines de la normalización social, l'asturianu, o nel so casu'l gallego-asturianu, ha ser la llingua normal y vehicular en qu'aparezan les lletres de los cantares y tolos testos impresos o dixitales qu'acompañen a la obra musical. Amás, polo menos la metá de los temes del discu han tener lletra y tar cantaos n'asturianu o gallego-asturianu.
El plazu pa presentar proyectos acaba'l 20 de xunetu del 2018.
