MADRID, 21 de Xunetu (Reuters/EP)
El Gobiernu d'Estaos Uníos va prohibir a los sos ciudadanos viaxar a Corea del Norte esti branu, dempués de la muerte d'un estudiante norteamericanu deteníu mientres una visita al país asiáticu, según anunciaron dos axencies de viaxes, Young Pioneer Tours y Koryo Tours.
L'operador turísticu Koryo Tours dixo que la prohibición sería anunciada'l 27 de xunetu y que va entrar en vigor 30 díes dempués. L'axencia aseguró que la embaxada sueca en Pyongyang, encargada de los asuntos consulares de los Estaos Uníos en Corea del Norte, informó-y de la prohibición, pero nun dixo cuántu tiempu duraría.
"Paez ser qu'en pocu más d'un mes va ser imposible que los turistes estaounidenses visiten Corea del Norte", dixo'l director xeneral de Koryo Tours, Simon Cockrell, a Reuters.
Otru operador turísticu, Young Pioneer Tours, indicó na so web que tamién lu informaren de la prohibición, citando la mesma fecha.
"Dempués del períodu de gracia de 30 díes, cualquier persona nacionalizada estaounidense que viaxe a Corea del Norte va tener el so pasaporte invalidáu pol so gobiernu", dixo nun comunicáu Young Pioneer Tours.
MUERTE D'UN ESTUDIANTE ESTAOUNIDENSE.
Young Pioneer foi l'axencia que llevó al estudiante estaounidense Otto Warmbier a Corea del Norte a últimos del 2015. Detuviéronlu ellí y condenáronlu a 15 años de trabayos intensivos por un incidente nel so hotel, onde lu acusaron d'intentar robar una bandera comunista.
Corea del Norte lliberólu en xunu n'estáu de coma y morrió díes dempués de tornar a los Estaos Uníos a la edá de 22 años. Les circunstancies qu'arrodiaron la so muerte nun son clares, incluyendo por qué cayó en coma.
El país asiáticu dixo al traviés de los sos medios estatales que la muerte de Warmbier yera "un misteriu" y desmintió les acusaciones de que morriera como resultáu d'una tortura y palices recibíes en cautiveriu.
