UVIÉU, 23 Oct. (EUROPA PRESS) -
El conseyeru de Presidencia y Participación Ciudadana del Gobiernu del Principáu, Guillermo Martínez, informó esti llunes a los alcaldes del suroccidente de que'l so departamentu va impulsar un programa específicu pa la prevención, estinción y investigación de quemes na contorna suroccidental.
Esta iniciativa, enmarcada nel Plan Especial pa los Conceyos del Suroccidente, busca afondar na conocencia de les causes, tendencies y evolución de los fueos nesta zona y avanzar na sensibilización y participación ciudadana, según indiquen dende l'Executivu asturianu en nota de prensa.
El proyectu va combinar trés fases estremaes: diagnósticu, participación y definición d'oxetivos, y pal so diseñu'l Principáu va implicar a colectivos como'l Serviciu d'Emerxencies (Sepa), la Guardería del Mediu Natural, cooperatives forestales, agrupaciones de Protección Civil, ganaderos, llabradores y grupos ecoloxistes.
L'estudiu 'Analís de grandes quemes nel Principáu d'Asturies', ellaboráu pol Institutu de Recursos Naturales y Ordenación del Territoriu (Indurot), reflexa que dende 1983 a 2015 produciéronse na comunidá 50 fueos qu'afectaron a más de 500 hectárees. D'ellos, 21 alcuéntrense nos conceyos d'Ayande, Cangas, Ibias y Tinéu; esto ye, el 42% del total. Énte estos datos, el Principáu decidió diseñar una estratexa concreta pa la zona.
"Tomando en considerancia la singularidá de la contorna suroccidental, qu'afecta a la incidencia y los comportamientos nuevos de les quemes forestales, vamos diseñar un programa concretu d'actuación nesta materia", sorrayó'l titular de Presidencia.
La brigada d'investigación de quemes forestales (Bripa) del Suroccidente, con sede en Cangas, investigó l'añu pasáu 27 fueos: 9 en Cangas, 9 en Tinéu, 5 n'Ayande, 3 en Ibias y ún en Degaña. D'ellos, 24 fueron intencionales, el 89% del total.
ATAYAR CONSECUENCIES DEL FUEU
Martínez esplicó, coles mesmes, los planes del so departamentu nuna xunta con alcaldes celebrada n'Ayande y na que participaron tamién la conseyera de Desenvolvimientu Rural y Recursos Naturales, María Jesús Álvarez, y la directora xeneral d'Interior, Pilar Alonso.
Mentes l'alcuentru, el conseyeru presentó un balance inicial de la fola de 96 fueos en 41 conceyos qu'esixó l'activación del Plan de Protección Civil d'Emerxencia por Quemes Forestales (Infopa) dende'l vienres 13 hasta'l xueves 19 d'ochobre. Tamién se comprometió a cooperar colos representantes municipales y la Federación Asturiana de Conceyos (FACC) col propósitu d'racabar la rellación global de daños.
Pa buscar víes de financiamientu que permitar eliminar los perxuicios económicos, el Gobiernu d'Asturies dirixióse yá a la Comisión del Arcu Atlánticu y al Gobiernu d'España, solicitando ayuda pa que se flexibilicen los topes económicos que permitiríen aportar al Fondu de Solidaridá Européu y a les subvenciones que concede'l mesmu Executivu énte situaciones d'emerxencia.
Amás, reclamó a l'Alministración central l'articulación d'ayudes complementaries y trabayar xunto con Galicia y Castiella y Llión pa coordinar actuaciones.
"Igualmente, vamos esplorar toles midíes que podamos ufiertar dende'l Principáu", precisó'l titular de Presidencia, qu'amestó que'l Plan Especial pa los Conceyos del Suroccidente plantea namás en midíes de prevención y estinción de quemes una inversión de 9,2 millones hasta 2025. Estes acciones van dirixíes a fomentar les agrupaciones de voluntarios de Protección Civil, reforciar les midíes de prevención con desbroces y faxes auxiliares y la meyora d'infraestructures.
Como fórmula pa la meyora económica d'estos territorios, van impulsase, amás, acciones específiques dientro de la campaña turística Vuelve al Paraísu, nes que se van promocionar el Camín de Santiago Primitivu, al so pasu per Ayande, y el monte de Muniel.los. Amás, va editase un vídeu pa redes sociales y va llanzase una pequena campaña publicitaria centrada na contorna suroccidental.
MEDIOS HUMANOS Y MATERIALES
L'últimu episodiu de quemes movilizó a 502 persones: 100 bomberos del Sepa, 70 operarios d'empreses forestales, 100 miembros de la Guardería del Mediu Natural, 32 trabayadores de les Brigaes de Refuerciu contra Quemes y 200 soldaos de la Unidá Militar d'Emerxencies (UME).
A estos medios personales sumáronse 70 vehículos y ocho medios aéreos, anque les condiciones meteorolóxiques adverses torgaron el normal funcionamientu d'helicópteros y hidroaviones.
Los fueos obligaron tamién a desallugar, de manera provisional, a unes 50 persones de les localidaes de Xichón, L.larón y Viliel.la, en Cangas; suprimir les clases en 23 centros educativos y modificar la programación quirúrxica del hospital de la zona.
