UVIÉU, 7 Nov. (EUROPA PRESS) -
L'equipu de gobiernu del Conceyu d'Uviéu, integráu por SOMOS, PSOE y IX, afrima que, nel momentu en que la Xunta Xeneral del Principáu d'Asturies decida la revisión del Estatutu d'Autonomía, habría que reformar l'artículu 4 pa introducir la cooficialidá del asturian.
Al traviés d'una nota de prensa unviada pola oficina de prensa del Conceyu d'Uviéu, el tripartitu posicionóse nel debate sobre la oficialidá de la llingua asturiana. Asina, piden esti marcu llegal "pa garantizar los derechos de los y les falantes y caltener una de les señes d'identidá más importantes de la cultura asturiana".
Nel comunicáu señalen que nel momentu en que la Xunta Xeneral del Principáu d'Asturies decida la revisión del Estatutu d'Autonomía, "consideramos qu'habría reformase l'artículu 4 pa introducir la cooficialidá del asturianu, col envís de garantizar los derechos de los y les falantes y caltener una de les señes d'identidá más importantes de la cultura asturiana".
Mentanto esto nun se produza, afirmen qu'ha impulsase l'usu de la llingua asturiana nes alministraciones y nel ámbitu priváu, "escosando les posibilidaes yá previstes na vixente Llei d'Usu y Promoción del Asturianu".
