Gobiernu, PP y CiU piden respetu de los DDHH nel Sáhara, pero tamién nos campamentos de Tinduf

EP

MADRID, 9 de Marzu (EUROPA PRESS)

El Gobiernu, el PP y CiU coincidieron en pidir a Marruecos que respete los Derechos Humanos (DDHH) nel Sáhara Occidental, pero sorrayaron qu'estos valores universales tienen de cumplise tamién nos campamentos de Tinduf, n'Arxelia, que controla'l Frente Polisariu.

Asina s'espresaron tanto'l ministru d'Asuntos Esteriores y de Cooperación, Miguel Angel Moratinos, como los diputaos de PP y CiU Gustavo d'Arístegui y Jordi Xuclà, que recoyeron d'esta forma'l mensaxe llanzáu pol primer ministru marroquí, Abbas el Fassi, esta fin de selmana en Granada por cuenta del primer conceyu UE-Marruecos, nel que pidió que se fale tamién de les violaciones de DD.HH que, al so xuiciu, tienen llugar en Tinduf.

Moratinos compareció esta mañana ante la Comisión d'Asuntos Esteriores del Congresu pa falar del Sáhara y defendió que, en materia de DD.HH, "hai que ser firme con Marruecos, y España foilo", pero tamién "hai que ser firmes con toos", non yá con una parte porque "tanto débiles como fuertes tienen qu'asumir les sos responsabilidaes", dixo n'alusión al frente Polisariu y a Rabat.

"Hai que pidir respetu a los DDHH en tol Magreb, Oriente Próximu y nos campamentos" de refuxaos saharauis en Tinduf (Arxelia), sorrayó'l ministru, que fixo un llamáu a Arxel pa qu'acepte emitir pasaportes individuales en llugar de colectivos para los menores saharauis que viaxen cada branu a España porque asina lo esixe la nueva normativa Schengen del espaciu européu ensin fronteres.

Moratinos quixo poner en valor delles supuestes meyores que Rabat fizo últimamente en materia de DD.HH y nel Sáhara. Destacó asina la salida de la cárcel el pasáu 10 de febreru de la única muyer del grupu de siete activistes deteníos n'ochobre en Casablanca en visitando los campamentos de Tinduf --y que tenía dellos problemes médicos-- o'l regresu con toa normalidá esti domingu a Casablanca d'otru grupu d'activistes procedente de Tinduf.

"Igual Marruecos entendiere l'error de xestión" que cometió nel casu de l'activista saharaui Aminetu Haidar, que caltuvo en Lanzarote una güelga de fame de 32 díes pa protestar pola so espulsión forzada d'El Aaiún, y agora tea más interesáu nel respetu a los DD.HH", señaló.

Gustavo d'Arístegui compartió les apreciaciones del ministru y pronuncióse a favor de "un respetu escrupulosu" de los derechos humanos tanto nel Sáhara como en Tinduf, mientres que Jordi Xuclà (CiU) defendió tamién que s'analice" la situación nos campamentos de Tinduf.

MEYORES NES NEGOCIACIONES

Moratinos compareció pa esplicar los últimos acontecimientos que se produxeron nel contenciosu, que vivió una escalada de "tensión" cola crisis provocada pola güelga de fame de l'activista Aminetu Haidar, pero que tamién rexistró ciertes meyores.

El xefe de la diplomacia española destacó que na primer xunta informal que Marruecos y el Frente Polisariu tuvieron promovida pola ONU tres la crisis de Haidar --celebrada nes afueras de Nueva York en febreru pasáu-- ambes partes aceptaron "la primer vez" escuchar a la otra pa presentar la so propuesta sobre'l futuru del Sáhara.

Marruecos presentó nel 2007 un plan d'autonomía pal Sáhara sobre la base de la integridá territorial del reinu qu'acepta someter a consulta del pueblu saharaui nun referendu, mientres que'l Frente Polisariu esixe la celebración d'un referendu qu'incluya la opción de la independencia al par d'otres como l'autonomía.

La negativa de les dos partes a ceder nestos principios motivó que les negociaciones qu'entamaron nel 2007 quedaren bloquiaes dende'l 2008.

Moratinos remarcó coles mesmes que nel conceyu de Nueva York la delegación arxelina (esti país tamién participa nes conversaciones ente Rabat y de Polisariu nel marcu de la ONU) y la marroquí aceptaron debatir sobre les sos relaciones billaterales --que'l conflictu del Sáhara perxudica dende hai trés décaes-- y "acordaron retomar les visites ministeriales billaterales".

Nesti puntu, avanzó qu'España ta trabayando pa movilizar a Francia y EE.UU, dos países "con capacidá d'influencia" sobre les partes, coles mires de favorecer una "reconciliación" ente Marruecos y Arxelia --que les sos fronteres permanecen zarraes-- que dea pie a una "nueva relación" que facilite una solución pal Sáhara.

Moratinos señaló que la próxima xunta del foru mediterraneu 5+5 que va acoyer Túnez el 15 d'abril va suponer una oportunidá pa debatir esta cuestión y calificó de "inaceptable" que la única frontera zarrada nesti momentu nel mundu seya la que comparten Marruecos y Arxelia, cuando Rusia y Xeorxa, que vivieron una guerra recién, acaben d'abrir un pasu fronterizu.