UVIÉU, 3 de Xineru (EUROPA PRESS)
El Conseyu de Gobiernu del Principáu d'Asturies acordó va yá unos díes ampliar el capital social de la Radio Televisión del Principáu d'Asturies (RTPA) en 6,7 millones d'euros, según confirmaron esti martes a Europa Press fontes del Principáu.
D'esta manera, l'Executivu rexonal atiende a la fórmula planteada pol director xeneral de RTPA, Antonio Virgili, al traviés del informe nel que señalaba la necesidá de la midida pa facer frente a la deuda vencida, meyorar los ratios de lliquidez, solvencia y endeudamientu, amás d'evitar al mediu plazu la posibilidá d'entrar en causa de disolución.
"Lo que s'aprobó en Conseyu de Gobiernu supón na práctica la posibilidá de que RTPA liquide casi tola so deuda y quede garantizada d'esta manera la so viabilidá financiera, tal como solicitó'l so conseyu d'alministración", esplicaron dende l'Executivu.
Añadieron que la midida hai d'asitiase nel contestu de l'aprobación de la llei de segunda reeestructuración del sector públicu que regula la esistencia y funcionamientu de la cadena pública autonómica. Fusionáronse nel 2015 trés mercantiles dependientes d'un ente na sociedá denominada RTPA.
El so conseyu d'alministración aprobó'l proyectu de presupuestos pal 2017, que contempla una tresferencia del Principáu de 20 millones d'euros, pero solicitó coles mesmes que l'alministración autonómica atendiera la deuda de la sociedá, que, anque se venía amenorgando, precisaba una aportación de recursos "a mayores" pa garantizar la viabilidá financiera futura de la cadena.
"Rematar d'esta manera un procesu qu'entama nel 2014 y supón una apuesta decidida pol futuru d'un serviciu públicu fundamental pa la vida democrática asturiana y la defensa del nuesu patrimoniu cultural, según el caltenimientu de les nueses traces d'identidá", apunten dende'l Principáu.
A Antonio Virgili yá lu informaron nel so día de la decisión y yá comunicó a los conseyeros "la meyor de les noticies posibles". Asina, cola ampliación de capital d'esos 6,7 millones va esaniciase casi na so totalidá la deuda vencida.
