UVIÉU, 7 d'Ochobre (EUROPA PRESS)
El 22,6 por cientu de los asturianos aseguraron preferir que'l PSOE gobierne en solitario en cuenta de pactar con otres formaciones. Asina lo diz la encuesta postelectoral de les elecciones autonómiques asturianes del 2015 ellaboráu pel Centru d'Investigaciones Sociolóxiques (CIS).
La encuesta, consultada por Europa Press, reflexa que namás el 12,8 por cientu de los asturianos, a preguntaos poles sos preferencies sobre les alternatives pa formar Gobiernu, preferiríen un gobiernu de coalición ente PSOE ya IU. Ello ye qu'un 15,3 por cientu de los encuestaos apuesta por una coalición ente'l PSOE y Podemos, mientres que'l 25,9 de los encuestaos reflexaron que nun sabíen qué preferiríen.
L'estudiu postelectoral revela amás que'l 75,3 por cientu de los encuestaos volveríen votar al mesmu partíu si supieren que los resultaos de les elecciones diben ser los que fueron. Del total d'encuestaos, el 67,3 por cientu teníen decidío votar por un partíu o coalición, y namás el 9,4 por cientu dudó ente dellos partíos.
Ente aquellos encuestaos que mostraron dudes sobre qué votar nes autonómiques, el 17 por cientu revelaron que les sos dudes fueron ente'l PP y el PSOE, mientres que'l 14 por cientu dudaron ente Podemos ya Izquierda Unida y el 12 por cientu ente'l PSOE ya IU.
El 6 por cientu de los votantes que dudaron ficiéronlo ente'l PP y Foru, igual que'l porcentaxe de persones que dudaron ente Ciudadanos y PP. Ente'l PSOE y Podemos, dudaron un 8 por cientu de los electores, y ente POSE y Ciudadanos, un 2 por cientu.
Con un 22,8 por cientu de persones que reconocieron que nun acudieron a votar nes pasaes elecciones, el 24 por cientu argumenten que "da lo mesmo votar que nun votar, porque nun val pa nada", mientres que'l 23,3 por cientu reconocíen que nun-y inspiraba confianza nengún partíu nin nengún políticu. Igualmente, el 14 por cientu de los que nun votaron aseguraron que nun había nenguna alternativa que los satisficiera.
