Gotor almite qu'Ana Cano "pasó-y la patata caliente" y apuesta por resolver les coses "dientro de la normalidá"

El rector va nomar la próxima selmana un decanu comisariu ante la dimisión de tol equipu rectoral

UVIÉU, 26 de Xunu (EUROPA PRESS)

El rector de la Universidá d'Uviéu, Vicente Gotor, se refirió a la dimisión de l'hasta agora decana de Filoloxía, Ana Cano y de tol so equipu rectoral y en respuesta de los entrugues de los periodistes afirmó que "Cano pasáo-y a él la patata caliente", porque agora ye Gotor quien tien de tomar una decisión al respeuto. "A mí prestaríame qu'intetáremos buscar una solución dientro del marcu de la normalidá, el compromisu col asturianu ye'l qu'hai y les coses tampoco se puen facer al debalu", dixo'l rector.

Nesti sen, indicó que l'equipu rectoral tien d'estudiar "cómo foi'l procesu porque nun tenía nin idea, ya que los centros son autónomos nel so trabayu" y tien de conocer toles propuestes que se punxeron sobre la mesa.

Ana Cano anunció la so dimisón el martes tres la decisión de la propia Xunta de Facultáu d'aprobar una enmienda na que se suprime l'asturianu como asignatura na propuesta de la estructura académica de cara a los nuevos títutlos de grau. La decisión contó con 34 votos a favor, 30 a la escontra y siete votos en blancu.

Nuna rueda prensa ofrecida pa informar de los acuerdos del conseyu de Gobiernu de la Universidá, Vicente Gotor respondió a les entregues de los periodistes sobre esti asuntu y aseguró que, anque nun recibió oficialmente la propuesta, Ana Cano entregó-y esta mañana una copia de la carta presentada per rexistru na que nun sólo presenta la so dimisión sinón la de tol so equipu rectoral.

"Lo que me pidió ye qu'acepte la dimisión", dixo Gotor, qu'esplicó qu'agora ye él quien tien de tomar la decisión pa elixir al nuevu decanu comisariu pa que prepare les elecciones a les qu'Ana Cano ya nun podía volver a presentase a llevar ya diez años nel cargu. La decisión retrásase a la próxima selmana.

Vicente Gotor afirmó qu'agora lo que quier ye conocer cuáles yeren les propuestes de los otros profesores pa ver cómo se pue solucionar la situación. "Siempre dixe qu'estes coses hai que faceles despaciu y estudiales bien pa buscar la solución más apropiada", insistió'l rector de la institución asturiana, qu'aseguró que "van tratar de ser posible de llegar a un consensu".

ACTOS LLAMENTABLES.

De la mesma manera, el rector consideró "llamentable" qu'esta mañana la Universidá apaeciera "plagada de cartelos" insultando al profesor que presentó la enmienda a la propuesta d'Ana Cano, y aseguró qu'estos comportamientos "son mui universitarios".

Nesti sen, mostró tamién la so "sorpresa" ante les declaraciones "de baldre" d'organizaciones y dalgunos grupos parlamentarios que culpen al equipu rectoral de lo que pasó. Nesti sen, indicó que s'enteró de la dimisón de la decana porque ésta anunció-yla tres l'asamblea.

"Llamóme pa dicímelo y pa que nun m'enterare pela prensa y yo díxe-y que lo pensara, pero tenía ya la decisión tomada. Ye increíble que dalgunos grupos parlamentarios ya me culpen a mí cuando l'equipu rectoral dexa trabayar a los centros", dixo Gotor.