UVIÉU, 11 de Setiembre (EUROPA PRESS)
El rector de la Universidá d'Uviéu, Vicente Gotor, espresó güei la so voluntá de "buscar el consensu" p'atopar "una solución a la llingua ente los estudios reglaos" de la Facultá de Filoloxía, y mostró la so intención d'incluyir esti oxetivu ente les sos prioridaes na xestión universitaria.
Gotor espresó nesti sen, demientres l'actu oficial d'entrega de diplomes de los cursos de branu, que, como cada añu, la Universidá d'Uviéu y l'Academia de la Llingua organicen na escuela internáu de Santantolín d'Ibias, y nos qu'esti añu tomaron parte cerca de 80 alumnos. Xunto con él, presidieron l'actu la directora de l'Academia y ex decana de Filoloxía, Ana CAno, el director de los cursos, Xoxé Antón González Riaño, y el secretariu de los mesmos, Pablo Manzano.
Foi la primer vez na historia qu'un rector daba un discursu oficial n'asturianu y la segunda na que s'usaba esta llingua nun actu nel paraninfu de la Universidá, como recordó Cano. Gotor espresó la so "voluntá pa que la llingua y la cultura asturiana tengan el so llugar académicu y científicu na Universidá" y mostró la so intención de "buscar un consensu pa dar solución a unos estudios reglaos d'asturianu" en Filoloxía.
Dexaba entrever asina la solución que yá baraxa'l decanu de Filoloxía, José Antonio Martínez, pa iguar el conflictu surdíu na Facultá, tres la dimisión d'Ana Cano, pola aprobación d'una enmienda na Xunta del Centru que suprimía l'asturianu de la propuesta d'estudios reglaos pa esti títulu. La opción que se baraxa ye la de crear un 'mínor' d'asturianu, un itinerariu menor que sumaría 48 creitos, y que diba ser asemeyáu a la integración na carrera del actual cursu de postgráu d'especialista en llingua asturiana.
Gotor dexó claro que les sos declaraciones conllevaben un "compromisu" sobre "los estudios reglaos d'asturianu qu'hasta agora nun s'establecieron na Universidá".
El discursu del rector foi, en ciertu mou, una respuesta a Ana Cano. La ex decana mostró'l so interés pa que se buscare una solución a la situación de Filoloxía Asturiana. La directora de l'Academia agradeció al rector la so "collaboración" cola entidá, asina como'l fechu de que se dirixere al públicu n'asturianu y que lo ficiere nun espaciu como'l paraninfu.
Demandó tamién la implicación del Vicerrectoráu d'Estensión Universitaria na promoción de la llingua na Institución Académica, y el caltenimientu de la collaboración d'esta colos cursos d'Ibias.
Pela so parte, Riaño, agradeció a los presentes la so participación na actividá, asina como'l trabayu de los profesores qu'imparten les clases (desinteresáu dafechu), y destacó'l "altu nivel" d'esta edición.
PÁXINA WEB N'ASTURIANU.
Ante otra demanda d'Ana Cano, Gotor anunció que próximamente la páxina de la Universidá d'Uviéu va tener la so versión en llingua asturiana, llabor nel que yá tán trabayando los téunicos de l'Academia.