UVIÉU, 29 d'Ochobre (EUROPA PRESS)
Los cinco grupos parlamentarios que conformen la Xunta Xeneral del Principáu d'Asturies nun llegaron a un acuerdu sobre'l conteníu de la comisión d'investigación que va abrise na Cámara por cuenta de la supuesta fortuna tapecida de 1,4 millones d'euros que l'ex líder del SOMA, José Ángel Fernández Villa, notificó mientres la última Amnistía Fiscal promovida pol Gobiernu Central. UPyD y Foru defenden que la investigación incluya los Fondos Mineros, mientres que PP y PSOE pretenden "acutar" la investigación partiendo del casu de Villa.
El voceru del grupu parlamentariu socialista, Fernando Lastra, defendió la necesidá d'acutar l'ámbitu de la investigación sobre Villa a la so fortuna tapecida, con cuenta de que seya "factible" y non "daqué imposible dafechu por inabarcable". Asina, consideró necesario que'l puntu de partida seya la fortuna tapecida del ex cabezaleru sindical y, a partir d'ehí, siguir la investigación hacia los Fondos Mineros y los proyectos concretos colos que puea tar rellacionáu.
Sicasí, caltuvo que'l so grupu parlamentariu nun busca "poner llendes" a la investigación, pero sí que los grupos seyan "prácticos bastante pa nun cayer nuna xera que nun tenga fin". "Voi dexalo claro: vamos aceptar la propuesta que quieran, la mayoría, o unu o los que seyan. Porque nun punximos llenda a la investigación", apuntó.
El voceru socialista fizo estes consideraciones al cabu de la xunta de voceros parlamentarios que se celebró esta mañana na Xunta con cuenta de determinar cuál tien que ser la redacción del testu que se rexistre pa crear la comisión. Al so xuiciu, esta comisión tendría que centrase na fortuna de Villa y nun tornar nuna investigación de los Fondos Mineros nel so conxuntu porque supondría un "trabayu estensu" que nun conduciría a "nada concretu".
Esti puntu criticólu la vocera de Foru Asturies na Xunta, Cristina Coto, que defendió que la investigación xire sobre los dos puntos de primeres acordaos cuando se propunxo la creación de la comisión: los Fondos Mineros y la fortuna de Villa.
Al so xuiciu, querer llendar l'algame de la comisión a unu de los dos puntos reflexa la "voluntá política" de los grupos que lu punxeron y llastraría la eficacia de la mesma. Sobre la propuesta del voceru socialista d'analizar namás los proyectos de los Fondos que puen tar vinculaos a Villa, Coto recalcó que ye "imposible" entender, sin una investigación completa, qué proyectos tienen que ver con él y cuálos non. "O s'investiga dafechu o va ser ineficaz", sorrayó.
IU BUSCA'L CONSENSU
Pela so parte el voceru d'Izquierda unida na Xunta, Aurelio Martín, abogó pol consensu nel algame de la comisión porque pa IU "nun tien sen que la comisión empiece con discutinios" sinón que tien de ser operativa, tresparente y eficaz con cuenta de que determinar d'ónde vien la fortuna.
Por ello'l so grupu parlamentariu decidió nun facer una propuesta concreta, sinón xuntase a la que "xenere consensu", buscando que seya áxil, dao que la llexislatura acaba nel 2015.
Dende'l grupu parlamentariu popular, la diputada Emma Ramos defendió, igual que'l PSOE, la necesidá d'acutar el conteníu de la investigación a la fortuna tapecida de Villa con cuenta de que la comisión "nun torne nun maremagnum que torgue ver l'oxetu de la mesma".
A lo último, el diputáu d'Unión, Progresu y Democracia, Ignacio Prendes, defendió igual que Foru que la comisión tome tanto'l dineru tapecío como la xestión de los Fondos Minerosm, dao que "asina s'acordó" cuando s'aprobó por unanimidá la constitución de la comisión nel últimu Debate d'Orientación Política n'Asturies. "Cuando se vota tien que facese con criteriu políticu" defendió.
Esta tarde los grupos van presentar caún la so propuesta, y va ser el diputáu d'UPyD, Ignacio Prendes, l'encargáu de facer a lo llargo de güei una síntesis sobre les distintes opiniones que puea conducir a determinar el conteníu últimu de la comisión.
