MADRID, 15 d'Avientu (EUROPA PRESS)
El ministru d'Economía y Competitividá, Luis de Guindos, aseguró qu'España va cumplir "sin dificultá" les previsiones macroeconómiques d'esti añu, que contemplen un incrementu del PIB del 1,3%.
Asina lo punxo de manifiestu De Guindos mientres la so comparecencia na Comisión d'Economía del Senáu, onde aseguró que la situación d'España contrasta cola debilidá de la zona euru, porque tien un "tonu firme" y encara una evolución "más favorable" nel mediu y llargu plazu.
Nesti sen, De Guindos recordó que, al acabar la última parte del añu, España va encadenar yá seis trimestres al alza creciendo, con una tasa interañal que yá ta penriba del 1,6%, cifres que nun se víen dende hai casi siete años.
Amás, los principales indicadores disponibles ponen de manifiestu que va algamase "sin dificultá" el 1,3% previstu nel cuadru macro, lo que va suponer ciertu "puxu" pa entainar el crecimientu nel 2015.
Igualmente, De Guindos resaltó l'impactu d'esta recuperación nel empléu y el "xiru" qu'esperimentó'l mercáu llaboral nos últimos meses, que va permitir que la economía cree 800.000 empleos ente'l 2014 y el 2015, más que lo previsto de primeres.
