Hamás diz que podía algamase un altu'l fueu na Franxa de Gaza demientres la próxima selmana

XERUSALÉN, 7 de Xineru (EUROPA PRESS)

El voceru de Hamas, Ghazi Hamad, afirmó güei que'l movimientu islámicu y Israel podíen llegar a un acuerdu d'altu'l fueu na Franxa de Gaza demientres la próxima selmana, dempués de que Tel Aviv anunciare güei una tregua de tres hores al día pa permitir la entrada d'ayuda humanitaria nel enclave palestín.

Nuna entrevista concedida a l'axencia Maan y recoyida por Europa Press, Hamad aseguró que Hamas caltién una "actitú positiva" no que cinca a los esfuerzos "diplomáticos" p'algamar un altu'l fueu, en referencia a la propuesta d'Exipto y Francia.

"Pueo dicir que demientres la selmana va haber un compromisu de tregua y que l'atmósfera ta preparada pa los esfuerzos diplomáticos", esplicó'l voceru.

Pela so parte, Mark Regev, voceru del primer ministru israelí, Ehud Olmert, señaló hai poques hores que "les negociaciones continúen" de magar la iniciativa franco-exipcia, pero sorrayó que "la paz nel sur va depender de qu'acaben dafechu los disparos dende Gaza escontra Israel y de qu'haya un embargu d'armes efeutivu a Hamas que cuente con apoyu internacional".

Previamente, el Gobiernu israelí afirmó que valoraba la idea d'entamar un diálogu con Exipto col fin de poner fin a la violencia procedente de la Franxa de Gaza, anque nun dixo si diba aceptar o diba refugar la propuesta exipcia d'acordar un altu'l fueu qu'acabe tamién cola ofensiva israelí.

La oficina del primer ministru israelí, Ehud Olmert, aseguró nun comunicáu qu'El Cairo ta tentando d'alcontrar "una solución p'acabar colos ataques" de milicianos palestinos dende Gaza escontra territoriu israelí, asina como pa "frenar el contrabando d'armes" hacia la Franxa.