UVIÉU, 22 Mar. (EUROPA PRESS) -
La historia Margarita Mier y la socióloga Isabel Hevia, les dos profesores de la Universidá d'Uviéu, van tomar posesión como académiques de la llingua nueves el 4 de mayu próximu, Día de les Lletres Asturianes, na Xunta Estraordinaria de l'Academia nel Teatru Campoamor.
Asina lo anunció'l presidente de la institución, Xosé Antón González Riaño, qu'esti xueves presentó xunto al diseñador Santiago Fano l'actu del Día de les Lletres d'anguaño, que va celebrase'l 4 de mayu a les 20.30 hores nel Teatru Campoamor.
Margarita Mier ye historiadora, investigadora de los testos medievales n'asturianu y, según anunció Riaño, ta trabayando na coordinación de la primer historia d'Asturies "dende una perspectiva asturiana y con anovaciones dende'l puntu de vista metodolóxicu". Va tratase d'una historia "social" del pueblu asturianu que l'Academia cuenta publicar nel 2019.
Per otru llau, Isabel Hevia tien publicaos dellos estudios sociollingüísticos y socioeducativos sobre les actitúes de los profesores y alumnos hacia l'asturianu y ye "continuadora del trabayu sociolóxicu de Francisco Llera Ramo", afirmó Riaño en referencia a l'autor de los tres estudios sociollingüísticos d'Asturies fechos hasta la fecha.
"Tamos mui contentos con que dos muyeres d'esti valir vaigan collaborar cola institución", indicó'l presidente de l'ALLA, que destacó que la Xunta Estraordinaria ye un actu abiertu "nel que la institución ábrese a la sociedá".
Riaño quixo agradecer la collaboración del Conceyu d'Uviéu pol apoyu loxísticu al actu del Campoamor y a la publicación de 'Lliteratura', la revista que publica l'Academia coincidiendo col Día de les Lletres y qu'esti añu llega'l so númberu 34.
Nesta ocasión va ser con un monográficu dedicáu a la poesía de los autores más mozos de les lletres asturianes, colo que l'Academia quier "mostrar les posibilidaes d'una lliteratura con futuru".
NACHO VEGAS Y HOMENAXE A LA MÚSICA
La rueda de prensa tamién valió pa presentar el cartel del Día de les Lletres d'esti añu, diseñáu por Santiago Fano y que nesta edición fai un homenaxe a la música n'asturianu. Nél aparecen títulos de cantares y les siluetes d'artistes renomaos como'l líder de Dixebra, Xune Elipe, o'l cantautor Nacho Vegas, que va actuar nel Campoamor esti 4 de mayu como pieslle al actu con una esbilla del so repertoriu n'asturianu.
Nesi sentíu, Riaño destacó'l "compromisu bultable" del cantautor col actu de l'Academia y cola llingua asturiana "porque tenía más ufiertes, pero dende hai un añu tien acutáu esti día p'actuar nel Campoamor".
Sobre'l cartel, el so diseñador destacó que se trata d'un apueste arriesgáu que quier "reivindicar" l'arte pop y la música n'asturianu "que ye conocida en tola Península y que ye'l gran tesoru de la cultura asturiana dende los tiempos de la Transición".
Amás, Fano destacó qu'esta escena sonora asturiana tien un valir lliterariu "pa reivindicar" y que los "grandes poetes" de la nuestra lliteratura "fixeron lletres" pa los músicos de la tierra.
