UVIÉU, 24 de Febreru (EUROPA PRESS)
Un home, de 48 años, resultó firíu grave en saliéndose de la vía, por motivos que se desconocen, cola furgoneta que conducía y topetar contra la muria d'una vivienda na población valdesana de Setienes, nel AS-36, puntu kilométricu 1.800, según informó'l Serviciu d'Emerxencia del Principáu (SEPA).
Según los datos facilitaos pol Serviciu d'Atención Médica Urxente (SAMU) al firíu desagospiólu l'equipu médicu de la UVI-móvil d'Avilés al Hospital Universitariu Central d'Asturies (HUCA), n'Uviéu. Por cuenta de más pruebes y hasta nueva valoración médica presentaba politrauma de calter grave. Hasta'l llugar del accidente tamién se desplazó l'equipu d'Atención Primaria de L.luarca cola ambulancia de soporte vital básico de Navia.
Al firíu tuvieron qu'escarcelalu del interior de la furgoneta, matrícula O-6984-BG los efectivos de Bomberos del Serviciu d'Emerxencia del Principáu d'Asturies (SEPA) con base nel parque de Valdés.
La operación resultó complicada, dao que'l vehículu impactó contra una muria que cayó enriba de la cabina pel llateral del conductor. Por cuenta del choque, amás, los bomberos tampoco podíen acceder al firíu pela parte del copilotu, na que los asientos quedaron totalmente estrapallaos.
En comprobando que nun se podía mover el vehículu pa escarcelar al afectáu pol riesgu de que la muria cayera enriba, los bomberos procedieron a finxalu y decidieron acceder pela parte trasera de la furgoneta. Una vez descargada la madera que portaba, cortaron la verxa que separaba los asientos de la carga y retiraron lo mesmo los asientos del copilotu, como l'apoyu del asientu del conductor, el volante y un pedal.
Una vez qu'abrieron buecu, en collaboración y coordinación col equipu sanitariu procedieron a desagospialu, inmovilizáu con collarín, cola tabla de rescate.
El Centru de Coordinación d'Emerxencies recibió l'avisu a les 15.58 hores. Na llamada señalaben qu'un vehículu saliérase de la carretera y topetara contra una muria. Nel so interior había una persona firida y atrapada.
