Iglesias caltién qu'IU "nun va privar" a los asturianos d'un gobiernu estable

EUROPA PRESS

UVIÉU, 25 de Mayu (EUROPA PRESS)

El coordinador xeneral d'IU d'Asturies, Jesús Iglesias, resaltó esti vienres que la formación "nun va privar" a los asturianos d'un gobiernu estable, pese a nun formar parte del Executivu autonómicu, como decidieron ayeri les bases por una diferencia mínima de 13 votos.

En rueda prensa, Iglesias calcó en qu'en nengún momentu se plantegó la posibilidá de nun dar estabilidá al Executivu, sinón que se trató "una de les posibilidaes" pa garantizala, polo que d'equí p'alantre analizarásen otres víes como los acuerdos puntuales.

Jesús Iglesias cree qu'hubo "poco tiempu" pa esplicar la propuesta, anque caltién que la consulta d'esti xueves sobre'l preacuerdu col PSOE pa formar un gobiernu de coalición foi un exerciciu de "democracia" que fortalez a la organización, y supón un precedente qu'espera "consolidar pa tratar les grandes decisiones d'IU nel futuru.

Asina, aseguró que la organización tien que ponese "en posición firme" ante la decisión de les sos bases, algo que tamién fai'l mesmu Iglesias "sin reserves" y "comprometíu" colo que decidió la mayoría, incidiendo en que'l marxe foi "bien estrechu".

Por ello, considera que nun tendría sentíu que s'intentara sacar alantre l'acuerdu sin un apoyu convencíu de la militancia, qu'en poco más d'un mes va tener qu'escoyer a una nueva persona pa qu'asuma la coordinación xeneral d'IU n'Asturies. Sobre esi procesu, Iglesias aspira a que la candidatura ganadora llogre más del 70% de los votos y consolide la cohesión interna.

Jesús Iglesias, que confirmó que va ser propuestu como senador de designación autonómica, agradeció'l grau d'apoyu algamáu pola propuesta que defendió pa influyir dende dientro nes reformes que va tener qu'entamar el Gobiernu del socialista Javier Fernández, qu'a lo último va ser monocolor.

Al respecto, dixo que d'entrar al gobiernu fairíase de forma paritaria, con un candidatu y una candidata pa les conseyeríes acordaes col PSOE.

Agora ábrese l'escenariu d'acuerdos puntuales ente IU y PSOE, que prevén entamar l'estudiu de propuestes "de forma inmediata", una vez que se constituya'l nuevu Gobiernu d'Asturies.