UVIÉU, 23 d'Ochobre (EUROPA PRESS)
El creador de Mafalda, Joaquín Salvador Lavado Tejón 'Quino' (Premio Príncipe d'Asturies de Comunicación y Humanidaes 2014), l'alcalde d'Uviéu, Agustín Iglesias Caunedo, y l'escultor arxentín Pablo Irrang, inauguraron esti xueves oficialmente la escultura de Mafalda, que yá quedó definitivamente instalada nel Parque de los Patos del Campu de San Francisco.
Cientos de persones y periodistes acorrumpináronse ante la figura, de 80 centímetros d'altor, sentada sobre unu de los bancos, a la espera de que llegaren l'autor de la escultura y el creador del personaxe, pa descubrir la obra al públicu.
Darréu, 'Quino', que llegó acompañáu de la so muyer, Alicia Colombo, retiróse y los asistentes puxaron por facese les primeres semeyes xunto cola escultura y tamién con Pablo Irrang.
Mientres, l'alcalde, en declaraciones a los periodistes, señaló que Mafalda "toma agora'l relevu de Woody Allen (que tien la so estatua instalada na cai Milicies Nacionales)". "Son munchos los asturianos que van acudir esta fin de selmana a facese la foto con Mafalda y d'equí p'alantre van ser munchos los visitantes que tengan un aliciente más pa venir a Uviéu", añadió'l rexidor municipal.
Recordó qu'Uviéu "ye la segunda ciudá del mundu dempués de Bonos Aires que cuenta con una escultura pública de mafalda". Ello ye que l'escultor, Pablo Irrang, matizó que la d'Uviéu ye una reproducción prácticamente idéntica, anque col so vistíu en coloráu (la de Bonos Aires ye en verde) porque combina meyor col entornu, y materialmente reforzada pa soportar la dureza del iviernu asturianu.
L'artista mostróse "encantáu del prestosu recibimientu" que tanto él como 'Quino' tán teniendo n'Asturies, y mostróse seguru de qu'Uviéu "va cuidar mui bien" esta escultura.
