Industria va obligar a que los edificios en venta o alquiler tengan un certificáu d'eficiencia enerxética

Va llendar la temperatura nos eficios públicos, que nun van poder superar los 21 graos n'iviernu nin baxar de los 26 en branu

UVIÉU, 02 de Xineru (EUROPA PRESS)

El ministeriu d'Industria, Turismu y Comerciu va preparar un proyeutu de Real Decretu, que previsiblemente va aprobase enantes de mayu, pol qu'obliga a que tolos edificios, de nueva construcción o non, dispongan d'un certificáu d'eficiencia enerxética cuando se viendan o alquilen.

El departamentu que dirixe Miguel Sebastián va ampliar asina la normativa vixente, qu'establez esta obligación sólo nel casu de los eficios de nueva construcción y de los existentes que sufran modificaciones, reformes o remociques.

El Real Decretu supón la tresposición de la Directiva europea, del 16 d'avientu del 2002, sobre eficiencia enerxética de los edificios, y enmárcase dientro del Plan d'Aforru Enerxéticu 2008-2011, col que se pretende reducir el consumu d'enerxía en 44 millones de barriles de petroleu, lo que supón el 10% de les importaciones de petroleu n'España.

Nel marcu del mesmu plan, Industria prepara tamién una orde ministerial que va obligar a llendar les condiciones de temperatura nel interior de los recintos habituales asitiaos n'eficicios y llocales públicos.

NON MÁS DE 21 GRAOS NIN MENOS DE 26 GRAOS EN LLUGARES PÚBLICOS

Esta normativa va ser d'obligáu cumplimientu n'edificios y llocales d'usu alministrativu (oficines alministratives), comercial (tiendes, supermercaos, centros comerciales, restaurantes, bares...), cultural (teatros, cines, auditorios...) d'ociu (sales de baille y sales d'esposición), y nos edificios destinaos a estaciones de tresportes de persones y aeropuertos.

Concretamente, la temperatura del aire nun va ser superior a 21 graos n'iviernu nin inferior a los 26 graos en branu, cuando los sistemes de calefaición o refrixeración consuman enerxía convencional. Estes condiciones de temperatures tán referíes al caltenmientu d'una humedá d'ente 30% y 70%.

A lo último, nun van tener que cumplir con estes llendes aquellos recintos que xustifiquen la necesidá de caltener condiciones ambientales especiales, casu nel que debe existir una separación física ente esti recintu colos llocales contiguos y naquellos otros qu'usen fontes d'enerxía renovable o enerxía residual.