UVIÉU, 1 de Xunetu (EUROPA PRESS)
La delegación d'Iniciativa pol Asturianu presentó esti miércoles los resultaos del so viaxe de la selmana pasada a Xinebra pa esponer los problemes del asturianu ante'l 29 Conseyu de Derechos Humanos celebráu pol Altu Comisionáu de la Organización de les Naciones Uníes (ONU).
Na sede de l'Academia de la Llingua Asturiana y cola presencia del Secretariu de la institución académica, Roberto González-Quevedo, los miembros de la misión Inaciu Galán y Marissa Bordallo apuntaron a los grupos políticos de la Xunta Xeneral del Principáu que "la solución" a los problemes de la llingua asturiana ta "en trabayar pa reformar l'Estatutu ya incluyir la oficialidá".
Marissa Bordallo esplicó que la presencia d'Iniciativa en Xinebra y la "preocupación" de la ONU pola situación del asturianu como incumplimientu de los Derechos Humanos, "supón un finxu pa la llingua asturiana y pa la so reconocencia internacional".
Pel so llau, Galán detalló'l trabayu de l'asociación en Suiza, onde, de la mano de la European Language Equality Network (ELEN) formada por organizaciones en defensa de llingües en peligru de toa Europa, presentó al Altu Comisionáu de Derechos Humanos una muestra de "los casos de discriminación por cuestiones llingüístiques que se dieron nos últimos años en Asturies".
Xunto a la necesidá de reconocer la oficialidá del asturianu, Galán marcó como primer prioridá "dar solución a la discriminación de forma inmediata" per mediu de la puesta en marcha de les ferramientes llegales que yá existen: la Llei d'Usu del Asturianu de 1998 y la Carta Europea de Llingües Minoritaries ratificada por España nel 2001. "Dos elementos llexislativos inoraos dafechu n'Asturies", recordó.
Iniciativa pol Asturianu ta reuniéndose colos grupos parlamentarios de la Xunta Genral pa esplica-yos los resultaos del so viaxe y poniendo de relieve "la necesidá" de que la oficialidá forme parte de "el discutiniu políticu nesta llexislatura". Amás, solicitaron a los partíos el diseñu y l'aprobación d'un Plan de Normalización p'Asturies", "antes del final d'añu", pa que nel 2016 haya "meyores" na normalización del asturianu y el gallegoasturianu.
