UVIÉU, 22 d'Avientu (EUROPA PRESS)
La Asociación Iniciativa pol Asturianu solicitó al Gobiernu asturianu que retire la partida autonómica que recibe la Real Academia de la Lengua Española por negase a modificar la definición que nel so diccionariu oficial apaez de la palabra 'bable', refiriéndose a esti idioma como un dialectu, y non como una llingua.
Nuna nota de prensa, Iniciativa refirióse a la propuesta presentada nel Congresu los Diputaos por Gaspar Llamazares, diputáu d'IU por Asturies, pa solicitar a la Real Academia Española'l cambiu na definición de los términos asturianu", "bable", "asturlleonés" y "lleonés" nel so Diccionariu, qu'acaba d'estrenar edición.
Tres refugase tal midida, Iniciativa señala que'l pasu a dar agora "ye pidir al parlamentu asturianu que tome midíes contra esti agraviu provocáu pola Real Academia Española". "Pa ello, solicitamos a los partíos presentes na Xunta Xeneral que retiren de los presupuestos autonómicos la partida dirixida a la Fundación Pro Real Academia Española, que la nuesa comunidá vien pagando dende va años, en solitario, xunto con Murcia y Cantabria, mientres l'Academia de la Llingua Asturiana nun recibe nin un euru de los Presupuestos Xenerales del Estáu, como sí reciben les academies española, gallega, vasca y catalana".
"Somos la única comunidá con academia que nun recibe dineru y la única de toes elles que dedica parte del so presupuestu a financiar a la RAE. A la vista de la falta de respetu y reconocencia de la RAE hacia l'asturianu, paeznos que ye'l momentu de retirar esta partida en favor de la infrafinanciada Academia de la Llingua Asturiana", critica la organización.
Asina, recordó que que l'asociación "presentó yá nel 2012 un informe que entregáu en mano na sede de la institución en Madrid. L'informe, nel que se daben razones puramente ciéntifiques, taba avaláu por un llistáu de prestixosos filólogos de diez universidaes del mundu enteru, y recibió como respuesta de la RAE'l compromisu de tenelu en cuenta al realizar esta nueva edición qu'entós taba en preparación".
La nuesa intención, recuerda la organización, "foi entós tratar el tema como una cuestión ciéntifica y dientro del campu del rigor filolóxico, pero vimos como la RAE nun taba dispuesta a reconocer al asturianu como la llingua que ye nel so diccionariu y anque llevó alantre cobardes reformes nes entraes del so diccionariu, nun iguaron la situación".
L'asociación llamentó "fondamente que'l Partíu Popular volviera torgar l'aprobación d'una propuesta positiva pal asturianu nel Congresu, como yá fizo dos años siguíos cola nuesa propuesta pa dotar a l'Academia de la Llingua Asturiana de presupuestu estatal".
La organización recuerda que "bable" pasó de definise como "Dialectu de los asturianos" a "Perteneciente o relativu al asturianu o a los bables" y como "Variedá actual del asturlleonés", sin dexar clara la so categoría de llingua. Na entrada "asturianu" qu'antes nun tenía nenguna acepción dedicada a la cuestión llingüística, agora la cuarta recueye "Variedá actual del asturlleonés que se fala n'Asturies".
A xuiciu de l'asociación, "el casu más grave dase na definición del términu asturlleonés" que da por muerta a la llingua, al definilu como "Dialectu romance que se falaba n'Asturies y nel antiguu reinu de Lleón", casu paecíu al de la definición de "lleonés"".
