Interior va incluyir na Llei de Seguridá Ciudadana la cofinanciación de la seguridá en partíos de fútbol

CALATAYUD (ZARAGOZA), 24 de Mayu (EUROPA PRESS)

El ministru d'Interior, Jorge Fernández Díaz, avanzó esti xueves que'l Ministeriu va incluyir na nueva Llei Orgánica de Protección de la Seguridá Ciudadana la cofinanciación de los gastos de seguridá naquellos eventos de calter lucrativu qu'impliquen un espliegue importante de midíes de seguridá. Esti anunciu produzse un día dempués de plantegar que los equipos de fútbol paguen parte del dineru que s'invierte nos operativos policiales mientres los partíos.

Según dixo, el so Departamentu yá tien esta iniciativa "en mui avanzáu estáu d'ellaboración". L'actual normativa data de 1992 y el Ministeriu desea "nun sólo actualizala, sinón reformala en fondura" pa ellaborar un nuevu testu qu'incluya esti aspectu.

En declaraciones a los medios de comunicación mientres la so visita al conceyu zaragozanu de Calatayud, observó que "mos paez absolutamente razonable" que los promotores de "aquelles iniciatives y eventos que tienen ánimu d'arriquecimientu y qu'esixen pola so naturaleza un gastu en seguridá considerable, que financien el conxuntu de los ciudadanos", se corresponsabilicen d'esi gastu que supón garantizar la seguridá n'eventos deportivos y culturales, como grandes conciertos, nos que los sos promotores "llogren cuantiosas retribuciones".

Poro, paezmos razonable esa coparticipación na financiación "d'esos gastos", repitió, pa esclarar que "rescampla" que van quedar fuera d'esta midida los eventos "que nun tengan ánimu d'arriquecimientu, que seyan benéficos o de carácter asistencial" y tampoco "otru tipu de gastos d'espliegue de midíes de seguridá con ocasión de visites oficiales de xefes d'Estáu".

Esti proyectu de llei "ye la mio intención" que s'apruebe nel Conseyu de Ministros "primero qu'acabe esti periodu de sesiones", pa que s'envíe al Congresu de tal suerte que la so tramitación, debate y aprobación poles Cortes Xenerales se produza esti añu y entrara "en vixencia a primeros del añu qu'entra",

El ministru detalló, coles mesmes, que tovía nun se reunió colos directivos de clubes deportivos pa tratar esta cuestión y alvirtió de que, anque'l Gobiernu "escucha a tol mundu, salió escoyíu pa gobernar", polo que la decisión final va corresponder al Executivu.

"Nun momentu como l'actual, en que pidimos esfuerzos y sacrificios al conxuntu de la ciudadanía n'ámbitos tan sensibles como la educación y la sanidá, ye razonable qu'eses persones físiques o xurídiques, clubes de fútbol o promotores se responsabilicen esos gastos de seguridá, sorrayó, p'acabar insistiendo en que, en tou casau, "vamos sentir a tol mundu" na ellaboración d'esta normativa.