MADRID, 29 de Mayu (EUROPA PRESS)
La Guardia Civil intervino más de trés millones de dosis de falses melecines y detuvo a 14 persones na mayor operación europea contra'l tráficu d'anabolizantes y sustancies prohibíes nel deporte. La operación Dianu' tenía la so principal célula en Málaga, dende onde se comercializaben ente culturistes sustancies sin control sanitariu algunu que proveníen de países como China ya India.
Amás d'en Málaga, la organización criminal taba asitiada n'España n'Alicante, Valladolid y Valencia. La rede tenía ramificaciones en Francia y Alemaña y contaba con una loxística capacitada pa enviar 3.340 paquetes nos dos últimos años. De los 14 deteníos, toos son españoles sacante dos venezolanos; unu de los arrestaos en Málaga ye un médicu espertu en medicina deportiva.
Les falses melecines distribuyíense entre culturistes al traviés de dos destacaos deportistes d'esta modalidá deportiva que rexentaben nesti momentu instalaciones deportives nes poblaciones de Valladolid, Fuengirola y Arroyo de Miel (Málaga).
Calcúlase que la organización criminal podría igresar por estes actividaes sobre 500.000 euros nos últimos trés años, según espunxo esti llunes Juan José Reina, comandante xefe del Departamentu de Delincuencia Especializada de la Unidá Central Operativa (UCO) de la Guardia Civil. "Toles sustancies distribuyíense nel mundu del culturismu, sacante algunes que s'usaben como potenciadores sexuales", comentó esti responsable policial.
La Guardia Civil destacó'l "llaboratoriu-supermercáu" de la célula en Málaga, que taba compuesta por siete persones, una d'elles un médicu n'activo, y dirixida por un famosu preparador del mundu del culturismu de proyección internacional que s'encargaba de la distribución de sustancies "per toa España y países del estranxeru".
La célula de Valladolid (con réplica n'Alemaña) taba compuesta por dos persones, una d'elles otru destacáu culturista n'activo propietariu de dos ximnasios de la capital pucelana. Equí realizáronse dos rexistros en cases y otros dos en ximnasios y llocales comerciales, onde los axentes confiscaron una gran dosis de diverses sustances dopantes, un arma corta y unos 70.000 euros n'efectivo.
En total, practicáronse 25 rexistros ya interviniéronse más de 120 tipos de sustancies distintes como esteroides, anabolizantes, hormones y principios activos y potenciadores sexuales, asina como diversa maquinaria ya instrumentos pa la fabricación y acondicionamientu de los mesmos. Nos rexistros tamién s'intervinieron 2,7 quilos de cocaína. Amás, bloquiáronse cuentes por un valor superior a dos millones d'euros.
