Israel bombardia'l Ministeriu d'Interior y la Universidá de Gaza

Reuters

CIUDÁ DE GAZA, 29 d'Avientu (Reuters/EP)

Dellos aviones de guerra d'Israel bombardiaron güei'l Ministeriu d'Interior de Gaza, controláu por Hamás, no que ye'l primer ataque aereu a un edificiu gubernamental na ofensiva israelí, según anunció la organización palestina.

Ye'l tercer día siguíu d'ataques, dempués de matar a 307 palestinos demientres les incursiones aérees del fin de selmana. Nesti momentu, l'exércitu israelí ta preparándose pa una posible invasión militar.

Israel, qu'aumentó los sos ataques aéreos dempués d'anueche, acabando cola vida de siete nuevos civiles, aseguró que la so campaña del sábadu yera en respuesta a los ataques casi diarios de cohetes y morteros dende territoriu palestín al so país, fechos que s'intensificaron dempués de que la selmana pasada acabare l'altu'l fueu de seis meses que pautaren dambes partes.

Amás, güei se produxo'l primer ataque a un edificiu oficial na ofensiva d'Israel, que bombardió pela mañana'l Ministeriu d'Interior de la Franxa de Gaza, controláu por Hamas.

Mark Regev, voceru del primer ministru israelí, Ehud Olmert, esplicó que l'aición militar diba continuar hasta que la población del sur d'Israel "nun viva más nel mieu de los constantes ataques con proyeutiles". Esta operación militar podía "tomar dellos díes", según el voceru del Exércitu israelí Avi Benayahu.

Israel desplegó dellos tanques na frontera cola Franxa de Gaza, llistos pa entrar nel enclave llitoral, nel que viven un millón y mediu de palestinos. Amás, l'alministración d'Olmert aprobó la convocatoria de 6.500 soldaos de reserva, según avanzó un representante del Gobiernu.

Pel so llau, Hamás se caltién desafiante y el voceru del grupu Fawzi Barhum encamentó a los palestinos a usar "tolos medios disponibles, incluyíes les operaciones de martiriu", una referencia a los ataques suicides n'Israel.

Los precios del petroleu subieron güei cerca de dos dólares, hasta casi los 40 dólares por barril mientres los analistes afirmen que'l conflictu ente Israel y Hamás recordó a los operadores el riesgu xeopolíticu qu'enfrenta'l suministru de petroleu n'Oriente Próximu.

En cuanto a la reaición de la comunidá internacional, el Conseyu de Seguridá de la ONU pidió'l fin de la violencia, anque'l tovía presidente d'EE.UU, George W. Bush, responsabiliza a Hamas, organización de la que diz que ta nes sos manes renovar la tregua.

La ofensiva israelí enfureció a los árabes d'Oriente Próximu, onde manifestantes quemaron banderes israelís y estaounidenses pa presionar por una respuesta más dura de los sos cabezaleros en Gaza.

Israel inoró la presión internacional pa detener la ofensiva, según un funcionariu israelí que refugó que lu identificaren.

Amás, Hamas denuncia qu'un ataque aereu israelí destruyó un llaboratoriu de la Universidá Islámica en Gaza, un destacáu símbolu cultural. L'Exércitu israelí xustificó l'agresión afirmando que'l llaboratoriu usábalu Hamas pa desarrollar armes y esplosivos.

Calteniendo la presión sobre Hamas nuna de les xornaes más sangrientes pa los palestinos en 60 años de conflictu, aviones israelís destruyeron el principal complexu de seguridá de Gaza, causando la muerte a polo menos cuatro axentes de seguridá.

Israel asegura que demientres los primeros dos díes de la so ofensiva los milicianos palestinos llanzaron cerca de 150 cohetes y morteros escontra l'Estáu xudíu y qu'un home israelí morrió'l sábadu.

La situación provocó que decenes de ciudadanos de Gaza cruzaren hacia Exipto al traviés de furacos que ficieron na muria fronteriza con 'bulldozers' y esplosivos. Na frontera, un guardia exipciu y un mozu palestín morrieron nun enfrentamientu mientres la policía exipcia tentaba de pesllar el pasu, según confirmaron mélicos y fontes de seguridá exipcies.

La violencia tamién s'estendió a la Cixordania ocupada, onde soldaos israelís dispararon escontra manifestantes palestinos armaos únicamente con piedres. Según dellos mélicos, dos palestinos morrieron nel ataque.

UN NEUROCIRUXANU ASEGURA QUE CINCO NEÑES MORRIERON POLOS BOMBARDEOS

El neurociruxanu xefe del hospital de Shifa, en Gaza, Osama Said Aklouk, denunció güei que polo menos cinco neñes morrieron esta nueche por mor del bombardéu de dos edificios de viviendes per parte d'Israel y aseguró que'l 15 por cientu de les víctimes de los ataques israelís escontra la Franxa de Gaza son muyeres y neños.

"Los firíos y los muertos nun paren de llegar y l'últimu balance hasta esta madrugada ye de 307 muertos y más de mil firíos, 15% d'ellos son muyeres y neños", declaró'l mélicu palestín a Radio Nacional.

"La última nueche la pasemos mui mal, bombardiaron edificos del gobiernu de Hamas, bombardiaron la universidá de Gaza, bombardiaron el puertu marítimu, bombardiaron dalgunes oficines, dalgunes mezquites y sobre too tán bombardiando cases civiles", comentó. "Bombardiaron dos cases y sacamos d'embaxo de los escombrios a tres neñes de Jabali y a otres dos o tres en Rafa", aseguró.

Said denunció tamién qu'Israel torgó'l pasu de suministros mélicos dende Exipto. "Por desgracia entamaron los xudíos a bombardiar la frontera ente Exipto y Gaza y pararon tolos suministros exipcios", declaró. "Teníemos previsto mandar a dalgunos enfermos, entamáremos a mandar 15 ambulancies con enfermos pa pasalos a Exipto, pero polos bombardeos israelís na frontera tuvimos que tornar a los hospitales", añadió.

Según Osama Said, los mélicos tán "desbordaos". "Nun tenemos lluz, tamos con xeneradores eléctricos de gasolina, pero la gasolina nun llega dende Israel, hai escasez d'agua, d'otros medios sanitarios", manifestó. "Llevamos un añu y mediu d'embargu total, tamos con reserves cero", añadió.